بی ایس او نا مسکوہی چئیرمین و بلوچ نیشنل مومنٹ نا مسکوہی جنرل سیکریٹری رحیم بلوچ ایڈوکیٹ ایکس آ شنگ کروک تینا اسہ بیان ئسیٹی پارینے کہ اسلام آباد ئٹی مروکا شنگھائی تعاون تنظیم نا کانفرنس نا وختا ای کانفرنس ئٹی اوار مروکا شرفدار آتا پام ئے بلوچ الس ئنا جہد آجوئی نا کنڈ آ ہتنگ خواہوہ۔
او پارے کہ ای شنگھائی تعاون تنظیم نا باسک ڈیہہ تا غٹ نمائندہ غا تیا پھاش کننگ خواہوہ کہ بلوچستان پاکستان نا بشخ ئس اف بلکہ دا اسہ آزات ریاست ئس اس ہراتم پاکستان 1947 ئٹی جوڑ مس۔ بلوچستان ہندوستان نا ریاست ئس الو، اندا سوب آن دانا جوڑ مننگ نا وختا دا پاکستان نا بشخ الو۔
بلوچ سروک رحیم بلوچ پارے کہ پدان، پاکستان بلوچستان آ (ہرادے او وختا ریاست قلات پاننگاکہ) زور ئٹ جلہو کرسا کوزہ کرے و تینتو اوڑدہ کرے۔ ہموتم آن بلوچستان آن مخلوق آجوئی کن جہد کننگ ءِ۔ تدوکا 25 سال آن کوزہ مروک بلوچستان ئٹی پاکستان نا کوزہ، اونا استعماری پالیسی و بلوچ راجی مڈی تا لُٹ پُل نا برخلاف چرجوئی ئٹ جہد برجاء ءِ۔
او پارے کہ دا پاکستان اف بلکہ بلوچستان ءِ ہرا نا سیمک ایران، اوغانستان تون مِلیرہ و ایران، اوغانستان آن ہلیس دے کہی و نیامکو ایشیائی ڈیہہ تِہ اسکان ہنوکا کسرک بلوچستان آن کارہ۔ دا کوزہ مروک بلوچستان ءِ ہرا نا سمندری ہند آک متحدہ عرب امارات و افریقی براعظم آن خڑک ءُ۔
اونا ودیک پاننگ اس کہ اگہ شنگھائی تعاون تنظیم نا باسک ڈیہک خطہ ٹی ایمنی، شونداری، خوشحالی و دیمروی خواہرہ و خطہ نا ڈیہہ تا نیامٹ جوانو سیالی و تعاون خواہرہ گُڑا اوفتہ پاکستان آ کوزہ مروک بلوچستان آن پیشتمنگ آ زور شاغوئی تمو۔ ایس سی او نا باسک ڈیہہ تا دا کڑد آزات بلوچستان ئے دا ہیت آ تیار کننگ کیک کہ او ایس سی او تون حوالکاری و تعاون نا کوشست نا وڑ و ڈول تیا ٹَک خلے۔
او پارے کہ پاکستان بھاز کوشست کرو کہ او بلوچ راجی آجوئی نا تحریک ءِ دہشست گردی ثابت کے ولے کنے اومیت ءِ کہ شرفدار آ نمائندہ غاک راجی آجوئی نا تحریک و دہشست گردی نا نیامٹ فرخ ئے پہہ مرور۔
