بلوچستان لبریشن فرنٹ نا ترجمان میجر گہرام بلوچ میڈیا غا شنگ کروک تینا درشان ئٹی پارینے کہ یانزدہ اکتوبر جمعہ نا دے تنظیم نا تومکا سرمچارک آواران نا ہند پیراند سورج کور نا کنڈ آ تنظیمی کاریم تیکن سفر کننگ اسُر کہ پاکستانی ریاست نا جوڑ کروکا ڈیتھ اسکواڈ کارندہ غاک کسر آ سلوک اسُر۔ او تومکا سرمچار تہ خننگ تون اوفتیا سُمکاری بناء کریر و اوفتِہ گھیرہ کننگ نا کوشست کریر، سُمکاری آن کیپٹن طالب بلوچ و عادل بلوچ شہید مسُر۔
او پارے کہ میر محمد نا مار کیپٹن طالب بلوچ عرف مودی ہراکہ دراسکی آواران نا ہندی ئس اسک، 2012 آن بلوچستان لبریشن فرنٹ تون اوار اسک و بلوچستان نا راجی آجوئی کن تینا زند ئے تسس، کیہی اہم جنگی کاریم تیٹ بشخ ہلکسس و دژمن ئے جانی و مالی نسخان رسیفیسس۔ بسیمہ، رخشان، بالگتر، واشک، مشکے، آواران، کیچ، اورماڑہ و گچک پَنجگُور نا جتاء ہند آ تیٹ تنظیمی آپریشن تیٹ بھلو کڑد ئس سر تسس۔
جارکش پارے کہ شہید طالب بلوچ تینا سنگت آتیکن مہروان و ہمدڑد ئس اسک، و عزم و استقامت تون اوار کاریم کریکہ۔
او پارے کہ ریاستی لشکر شہید نا خاہوت ئے اشتماعی سزا نا گواچی کرے تاکہ اودے نزور کرسا راجی جہد آن کشنگ کے۔ خاہوت نا بندغ آتِہ زوراکی ئٹ بیگواہی نا گواچی کننگا، اوفتا مڈی تِہ خاخر تننگا، اوفتِہ ہمپنگ آ بیوس کننگا۔ واہم دا کل ظلم و زوراکیک ہم شہید نا عزم ئے پرغنگ کتوس۔
او پارے کہ شہید کل ہڑاند آتیان و ریاستی لشکر نا تادی تیان پر ہم راجی آجوئی کن تینا سوچ آن پدی متو۔ اونا عزم و قربانی دا ہیت ئنا ثبوت ءِ کہ جہد آجوئی نا کسر آ بروکا ہڑاند آک ہم اونا جیرت ئے پرغنگ کتوس۔ اونا دوانزدہ سال ئنا جہد قربانی نا فلسفہ نا عملی عکس اسک، و او ایسر ئٹ شہید آتا کاروان نا بشخ مس۔
جارکش پارے کہ نواب نا مار شہید سرمچار عادل عرف، ہراکہ زیارت ڈن ئنا ہندی ئس اسک تُدوکا اسہ سال آن بلوچستان لبریشن فرنٹ تون اوار اسک، و تنظیم نا شاری نیٹورک نا بشخ اسک۔ او اَسہ پرعزم، خوانوکو و وطن نا آجوئی نا جہد ئٹ تینا ساہ ئے ندر کروکو دلیرو سرمچار ئس اسک۔ دژمن ریاست نا ڈھکوک ادارہ غالباِرا وار اوے زورانسری ئٹ بیگواہی نا گواچی کریر ولے کل سختیک اونا جُہد ئٹ ہڑانڈ شاغنگ آ بےسوب مسُر۔
او پارے کہ دژمن نا ڈیتھ اسکواڈ نا کل کارندہ غاتا چاہنداری مسُنے و اوفِہ کُل ئے اوفتا ایسر آ سر کننگ مرو۔ بلوچ راجی تحریک آجوئی نا برخلاف کاریم کروکا تِہ ہچ دروشم ئٹ بخشنگ مروف۔
او پارے کہ بلوچستان لبریشن فرنٹ تینا دلیر آ سنگت سرمچار شہید کیپٹن طالب بلوچ و شہید عادل بلوچ ئے اوفتا عظیم قربانی آ دروت ندر کیک۔ و دا عزم نا اعادہ کیک کہ شہید آتا مشن ئے ہر دروشم ئٹ مزل اسکان سر کرسا اوفتا آجوئی نا تُغ ئے گواچنی دروشم تننگو، و دژمن ئے اونا ایسر آ سر کننگو۔
