بلوچستان لبریشن فرنٹ نا ترجمان میجر گہرام بلوچ تینا شنگ کروک بیان ئٹی پارے کہ 21 ستمبر 2024 آ ننکان نُہہ بجہ غا بلوچستان لبریشن فرنٹ نا سرمچارک بارکھان نا علاقہ اوچڑی ٹی کوزہ گیر پاکستانی لشکر نا چوکی و موبائل ٹاور آ جلہو کرسا ٹاور ئے اونا مشین تتون اوار بُن تسر۔ جلہو آن گڈ ڈیتھ اسکواڈز نا کارندہ غاک کاروائی نا ہند آ سر مسر و تینا مون سمکاری بناء کریر۔ سلاہ بند سرکاری ڈیتھ اسکواڈ نا اسہ ٹولی سرمچار آتا رند ئے ہلک ہرافتا ودار ئٹ مُست آن سرمچارک سنگر ہلکسر۔
میجر گہرام بلوچ پارے کہ کوزہ گیر پاکستانی لشکر نا کمک کن جوڑ کننگوک ٹولی ڈیتھ اسکواڈ نا کارندہ غاک بھلو وخت ئسے آن علاقہ ٹی ٹولی نا دروشم ئٹ گشت کننگ ءُ تاکہ بھتہ خوری و بلوچ الس ئے بیم ئنا گواچی کننگِہ۔ سرمچارک فوجی چوکی و موبائل ٹاور آ جلہو کرسا ہُشنگ نا تدبیر کریسر ہرا نا مسخت ریاستی وزیر اعلیٰ سرفراز بگٹی و اونا ایلم آفتاب بگٹی نا بھلنی ٹی کاریم کروک ڈیتھ اسکواڈ ئے اوفتا رکھوک ہند آتیان کشِسہ دک خلنگ مرے و اوفتا بھتہ خوری نا سزا تننگ مرے ہراٹی سرمچار تِہ سرسوبی دوئی مس۔
او پارے کہ سرمچارک حکمت عملی ئٹ کاروائی ئے ایسر کننگ آن پد ڈیتھ اسکواڈ نا کارندہ غا تا اوفتا رکھوک ہند آتیا ودار کریر، اندن کہ گمان اس ڈیتھ اسکواڈ نا کارندہ غاک سرمچار تا رند ئٹ بسر۔ اندن کہ ڈیتھ اسکواڈ نا کارندہ غاک اوڑے سر مسر، سرمچارک ہرا مُست آن سنگر ہلکسر، اوفتیا جلہو کریر۔ دا جھڑپ 21 ستمبر نا نن 22 ستمبر اسکان برجاء سلیس و دا نیامٹ ڈیتھ اسکواڈ نا 11 کارندہ مرگ ئنا گواچی و کیہیک ٹپی مسر، سخت ٹپی مروکا تیٹ دُتکی وزیر اعلیٰ بلوچستان سرفراز بگٹی نا ایلم آفتاب بگٹی ہم اوار اس۔
اونا پاننگ اس کہ 23 ستمبر آ اسہ پین جہہ ئسے آ سرمچار و ڈیتھ اسکواڈ نا کارندہ غاتا نیامٹ اسہ پین جھڑپ ئس مس ہراٹی ڈیتھ اسکواڈ نا پین اسہ 1 کارندہ ئس مرگ ئنا گواچی مس۔ اندن 24 ستمبر آ ڈیتھ اسکواڈ نا 2 کارندہ، سرمچارک اسہ پین جاگہ ئسے آ جھڑپ ئسیٹی مرگ ئنا گواچی کریر۔
او ودیک پارے کہ دا آپریشن ئٹی سنگت تنظیم بی ایل اے و بی آر جی نا سرمچارک ہم بی ایل ایف نا سرمچار تتون ہم کوپہ سلوک اسر۔ آپریشن آن پد سرمچارک تینا ٹھکانہ آتا کنڈ آ ہِننگ اسر و سرسلامت اسہ جاگہ ئسے آ سر مسر ولے 27 ستمبر آ چتری گورچانی نا علاقہ ٹی پاکستانی لشکر و ڈیتھ اسکواڈ نا کارندہ غاک سرمچار تہ گھیرہ کننگ نا کوشست کریر ہرا نا بھرم ٹی اسہ پین جھڑپ ئس مس ہراٹی پاکستانی لشکر و ڈیتھ اسکواڈ نا مُسہ کارندہ مرگ ئنا گواچی مسر، و بھلو جھڑپ ئس مس ہرا نا وختا سنگت تنظیم بلوچ لبریشن آرمی (بی ایل اے) نا سرمچار عمران لانگو عرف میرین بلوچ شہید مس ہرادے تنظیم دروت ندر کیک۔
ترجمان پارے کہ شہید عمران لانگو دلیر، جنگی لائخی تخوک و وطن دوستو سرمچار ئس اس۔ او تدوکا یک و نیم سال آن بی ایل اے تون اوار اس شہید سنگت عمران لانگو گچین جنگی حکمت عملی ئٹ دشمن نا کسر ئے تورے و تینا ایلو سنگت آتہ سرسلامت گھیرہ آن کشِسہ ایسری سُم ئنا فلسفہ غا عمل کرسا ساندہ کن زندہ سلیس۔
ترجمان نا ودیک پاننگ اس کہ سرفراز بگٹی ڈیتھ اسکواڈ نا برخلاف سرسوب آپریشن ئے قبائلی رنگ تننگ نا کوشست کرے و مسوری بگٹی قبیلہ نا بندغ آتہ ڈیتھ اسکواڈ تون اوار کرسا سرمچار آتا مونا سلیفنگ نا کوشست کرے، نن مسوری بگٹی قبیلہ آن خواست کینہ کہ سرفراز بگٹی و اوفتا کارندہ غا تیان مُر مریر و اوفتا ڈوہ ئٹی اوار مفس انتئے کہ بی ایل ایف بلوچستان نا آجوئی نا جنگ ئے کننگ ءِ دا نا ہچو بلوچ بندغ یا قبیلہ ئسے تون ہچو دشمنی ئس اف بلکہ ہرا بلوچ یا غیر بلوچ بندغ یا ٹولی کوزہ گیر پاکستانی لشکر و ڈھکوک ادارہ غا تا کمکار مس تو اوڑتون ہم ہمو روشت تخنگ مرو ہمر کہ کوزہ گیر دشمن تون مریک۔
اونا پاننگ اس کہ بلوچ سرمچار آتا روتہ غاک الس تون تفوک ءُ۔ سرمچار تا ہر کاروائی السی کمک و تعاون نا سوب آن منکن ءِ۔ نن السی تاغت و تعاون ئٹ بلوچ راج و بلوچستان ئے آجو کرون۔
میجر گہرام بلوچ پارے کہ کوزہ گیر ریاست و دا نا لغور آ لشکر سرفراز بگٹی کون آ زر کنوکا بندغ آک بلوچستان ئٹی سادہ غا بندغ آتہ رد ترسا ڈیتھ اسکواڈ ئٹی اوار کیرہ ہرا دشمن نا چالاخی و مکاری ءِ۔ دا حکمت عملی نا سوب دادے کہ باء تروکا تنخواہ دار لغور آ لشکر بلوچ سرمچار تا برخلاف جنگ کننگ کپک اندا سوب آن انگریز آتا پوجَھو پنجابی ہموفتا ” آہن ئے آہن دیک” و “ونڈ کر حکومت کر” نا چم بازی ئے کارمرز کننگ ءِ تاکہ بلوچ آتا مونا بلوچ آتہ سلیفنگ مرے و لغور آ لشکر نا ساہک بچھوک مریر۔
اونا ودیک پاننگ اس کہ نن جیونی آن ہلیس ڈیرہ غازی خان اسکان کل غیرتی آ الس آن خواست کینہ کہ دوست و دشمن ئے پُہہ مریر و دا پاکستانی زرخور آتا گندہ غا کاریم تیٹ بشخ ہلپس۔ کُل بلوچ آتا فرض ءِ کہ سرمچار آتا راجی کاروان ئٹی اوار مرسا دیہاڑ نا پنّو آتیٹ کاٹُم بُڑز مریر ہمر شہید عمران جان لانگو جھالاوان آن برسا دے ٹکی بلوچستان ئٹی تینا دتر نا ٹیکی تس و لمّہ ڈغار کن ندر مس، اندا ساہ ئنا ندر کننگ ئے کسر نشان تروکو چراغ ئس جوڑ کبو۔
او ایسر ئٹ پارے کہ بلوچستان لبریشن فرنٹ شہید سنگت عمران لانگو عرف میرین بلوچ ئے دروت ندر کیک و شہید آتا مسخے ئے مزل اسکان سر کننگ نا سوغند ہرفک۔
