بلوچ نیشنل موومنٹ نا چئیرمین ڈاکٹر نسیم بلوچ تنظیم ئٹی راہبند آ کاریم کننگ و شیفکو ادارہ غا تا بنجائی ادارہ آتون ہمگرنچ مننگ و بنجاہی ادارہ غا تہ سوگو کننگ آ زور تس۔ او یکہ مننگ و یکئی ئٹ کاریم کننگ ئے شیف خلِسہ پنت تس کہ بی این ایم نا باسک آک تنظیم نا راہبند نا تہٹی اشتماعی وڑ ئٹ کاریم کیر۔ تنظیم ئٹی یکئی سوچ ئنا گرج ارے ولے داڑا کاریم کننگ نا اسہ وڑ و ڈول ئس ہم ارے ہرا نا پابندی ئے ہر باسک ئے کروئی ءِ۔
او تینا دا خیال آتا درشانی ئے برطانیہ ٹی بی این ایم نا باسک آتون اسہ توڷ ئسیٹی کرے۔ چیئرمین ڈاکٹر نسیم بلوچ نا بھلنی ٹی مروکا دا مجلس مُسہ بشخ آ ساڑی اس۔ اولیکو بشخ ئٹی بی این ایم نا سینئر وائس چیرمین ڈاکٹر جلال بلوچ نا لکھوکا کتاب ’’پولیٹیکل منیجمنٹ‘‘ نا مون پھاشی مس۔ دا کتاب بی این ایم نا ہیل کاری لڑ ئنا بشخ اسے۔
دا توڷ ئنا انتظام ئے بی این ایم یوکے چیپٹر نا کمک صدر نسیم عباس کرے۔ ڈاکٹر جلال بلوچ نا کتاب نا مون پھاشی ئے بی این ایم نا چیئرمین ڈاکٹر نسیم بلوچ، جونیئر جوائنٹ سیکریٹری حسن دوست بلوچ، بی این ایم ڈنی ڈپارٹمنٹ نا کوارڈینیٹر فہیم بلوچ، ڈپٹی کوارڈینیٹر نیاز بلوچ و بی این ایم یوکے ہنکین نا پریزیڈنٹ منظور بلوچ اوڑدئی ئٹ کریر۔
ڈاکٹر نسیم بلوچ تنظیمی کاریم و راہبند آتیا ہیت کرسا پارے کہ بی این ایم اسہ جمہوری پارٹی ئس ءِ ولے جمہوری عمل نا ہم اسہ ادارہ جاتی وڑ و ڈول ئس مریک۔ اگہ اسہ باسک ئس پوسکنو وڑ و ڈول، پوسکنو سوچ و پوسکنا پالیسی تہ مونا ہتنگ خواہک تو اودے دا اصول آتیا عمل کروئی تمو۔ ہر پوسکنا خیال آ یونٹ ئٹ ہیت تران مرے، ہنکین زون اسکان سر مرے و ولدا بنجائی کمیٹی ٹی سر مرسا پالیسی جوڑ مرے تو او پارٹی پالیسی پاننگو، اسہ یکئو خیال ئسے پالیسی پاننگپک۔
او پارے کہ وخت وخت چاگڑدی حوالکاری میڈیا غا سنگت آتا لیکہ غا ہیت تران مریک و منَہ بندغ اندا سرپند مریرہ کہ دا پارٹی نا پالیسی ءِ ولے دن اسُل اف انتئے کہ پالیسی سینٹرل کمیٹی نا کنڈ آن بریک، اسہ خیال، صلح، یا لیکہ ئس بنجاہ غان منظور مریک گُڑا اوکان پد او پالیسی ئس جوڑ مریک۔ پارٹی مرے یا اسہ ڈیہہ ئس، او اسہ ہیرارکی نظام ئسے نا وڑ مونا بریک۔ ڈیہک ہم راہبند و ڈسپلن ئٹ جوڑ مروک ءُ و پارٹی ئے ہم اندا جوڑ کیرہ۔
بی این ایم نا چیئرمین بی وائی سی و پی ٹی ایم نا جہد آ ہم ہیت کرے و اوفتا ستا ئے کرے، او پارے کہ پاکستان بلوچ و پشتون ہڑتُما راج آتتون اسہ وڑ ئنا روشت تخانے و ہڑتُما راج آتیٹ نیشنلزم و نظریاتی سیاست نا سوگو مروکا روتہ غا تہ تھڑنگ نا کوشوت کننگ ءِ۔ پشتون چاگڑد ئٹ بلوچ آن زیات پاکستان راج مخالف عناصر آتہ مونا درینے۔ مذہبی انتہاپسندی و قبائلی نظام ہم اوڑے سوگو دروشم ئسیٹ ساڑی ارے، دا کُل ئنا برخلاف پشتون راجی سوچ ئتون پی ٹی ایم مزاحمت کننگ ءِ و تینا مسخت تون تفوک مرسا ہی او سرسوب مننگ کیرہ۔ داکان مُست ہرا گڑاک پشتون راج دوستی ئے مونا ہیسر اینو او پاکستانی پارلیمان ئٹی ءُ و چَپیکو پاسو آ گھام خلنگ ءُ۔ دا تاغت آک ہم پی ٹی ایم نا مسخت نا مونا ہڑاند ءُ۔
ڈاکٹر نسیم بلوچ پارے کہ پشتون تحفظ موومنٹ ( پی ٹی ایم ) و بلوچ یکجہتی کمیٹی ( بی وائی سی ) آ ریاست اندا سوب آن رکھ خلنگ ءِ کہ تومکا تنظیم آک پشتون و بلوچ راج ئے اختلاف آتیان کشِسہ اسہ راجی سوچ ئسے تون اوار کننگ ءُ۔
او پارے کہ بلوچ گلزمین آ راج دوستی نا ودکی، سیاسی حق آتا تحریک و اونا موہکش آتہ قبولیت رسینگانے۔ ہرا جوانو ہیت ئس ءِ ولے اوڑے ساڑی باسک آتہ ہنوکاتم (ماضی) آن کھشکنگ نا جاگہ غا ہنوکاتم نا آزموندہ غا تیان ہیل کننگ بکار ءِ۔ داڑے ساڑی سینئر سیاسی باسک آک اسہ مرغنو وخت ئس بلوچ جہد ئٹی گدریفینو، ہرا حالیت آتیان او گدرینگانو اوفتتو ہمو آزموندہ غاک اریر۔ سیاسی باسک آک دافتیان ہیل کرسا تینے منظم کیر۔ اسہ سختو وخت ئسے آن بی ایس او ( آزاد )، بی آر پی و بی ایم ایم گدرینگانو و ننا خوش بختی ءِ کہ نن اینو ہم بی این ایم نا تلہ غان جہد کننگ ان۔ دشمن راج دوست سیاسی باسک آتا برخلاف سخت کارروائی کرے، اوفتہ کھسفے، بندی کرے ولے اینو اوفتا سوچ بلوچستان نا ہر اُرا اسکان سر مسنے۔
چیئرمین نسیم بلوچ بی وائی سی نا برخلاف ریاستی کریک ڈاؤن آ تینا خلیس آتا درشانی کرسا پارے کہ بی وائی سی ئے ایسر کننگ کن پاکستان اسہ منظمو ڈٹ بندی ئس کرینے، ہراٹی 1997 ئٹی نواز شریف دور ئٹی جوڑ کروکا انٹی ٹیررازم ایکٹ ( اے ٹی اے ) نا فورتھ شیڈول پالیسی ہم اوار ءِ تاکہ پاکستانی ریاستی ادارہ غاتہ ہمو بندغ آتا برخلاف کارروائی نا آئینی اختیار مرے۔ دا قانود نا رد ئٹ اوفتا ہن ءَ بر ئے تورِسہ او جواز جوڑ کننگ کیرہ کہ دا آئینی عمل ءِ انتئے کہ فورتھ شیڈول ئٹی او بندغ آتیا دہشت گردی نا خلیس ارے۔ داسا دا بلوچستان نا سیاسی سرفیس آ ساڑی موہکش و باسک آتیاٹے کہ او اندنو پالیسی و، وڑ و ڈول تیا کاریم کیر کہ تینا ڈغار آ مرسا تینا کاریم تہ برجاء تخنگ کیر و مرغن وخت ئنا وارخواہی دوئی کننگ کیر۔
