پی ٹی ایم نا سروک منظور احمد پشتین نا کماشی ٹی پشتون راجی جرگہ مُسہ دے برجاء سلنگ آن پد ایسر مس ہراٹی پشتون سیاسی سروک، قبیلہ غا تا بھلاک و سیاسی کاریم کروکا ہزار آتا کچ ئٹ اوڑدئی کرسا اتفاق رائے ئٹ 20 ٹِک آ امنا مسر۔
او پاریر کہ دا ڈغار آ کوزہ کروک وردی یا بیدا وردی ئیا 60 دے ئٹی دا سرزمین ئے ہورک کیر۔ دا سرزمین نا شہید، بیگواہ غا بندغ و ڈغار تیا کوزہ ئے مُر کننگ کن وکیل آک عدالت آتا ذریعت ئٹ راج ئنا کیس ئے درور۔
او پاریر کہ اینو آن پد کس ہم فی یونٹ 5 روپئی آن زیات بل ایتوف، اگہ بجلی بند کننگا یا لوڈشیڈنگ نا ویل ودی مس تو داکان ایلو جہہ تِہ بجلی تننگ نا نظام ئے بند کننگو۔
اوفتا اسہ ٹِک دا اس کہ ڈیورنڈ لائن آ بیدس پاسپورٹ یا ویزہ ہِن ءَ بر نا موکل تننگِہ۔ و پختون سرزمین آ برجاء ڈغار نا جیڑہ غا تِہ جرگہ کمیٹی نا ذریعت ئٹ ایسر کننگِہ۔
جرگہ فیصلہ کرے کہ اینو آن پد وردی یا بیدس وردی ئیا تِہ بھتہ تننگ مروف، کس ئے دا بارث ئٹ فون بس تو کُل پختونک اوفتتون سلوک مرور۔
جرگہ فیصلہ کرے کہ کُل آئی ڈی پی تِہ اختیار تننگانے، نُم دے ئے گچین کبو، مُچا جرگہ و پختون راج نُما موہکشی ئے کرو۔ پنجاب سندھ و بنجاہ ٹی پختون خوانوک آتتون فرخ کروکا روشت بند کننگِہ، نہ تو تیبہ غا جرگہ و پختون آک اوفتا کمک کن ہمو علاقہ آتیٹ ہنور۔
داکان بیدس دا ڈیہہ ئنا مُست ئنا عمرانی معاہدہ (آئین) پن تننگانے، پوسکنا عمرانی معاہدہ دا سرزمین نا مشر آتا مرضی نا رد ئٹ جوڑ کننگِہ۔ جرگہ فیصلہ کرے کہ قبائلی علاقہ غا تِہ پڑو کروک داد، فنڈ یا کمک تننگ نا قول آتِہ پورو کننگ مرے۔ اندن او دا ٹِک آ ہم امنا کریر کہ بجلی نا نیمون ئٹ ہلوک زر اتِہ واپس ایتر۔
پختون ملٹری کورٹ و انٹرمنٹ سنٹرز آتِہ ایسر کننگ نا مطالبہ کننگا۔ آرٹیکل 158 نا رد ئٹ پختون سرزمین نا قدرتی گیس و 1991 انڈس واٹر معاہدہ نا رد ئٹ دیر آ حق تننگِہ۔
جرگہ نا کُل سیاسی قیدی تِہ یلہ کننگ نا خواست کرے، دا منَہ دے ئٹی جرگہ نا کاریم تا وختا دزگیر کننگوک بندغ آتِہ دمدستی یلہ کننگ مرے۔
جرگہ فیصلہ کرے کہ اگہ جرگہ نا اڈ تننگ، داٹی اوار مننگ یا کمک کننگ آ کس ئنا برخلاف کاروائی کننگا تو جرگہ سخت آن سختو فیصلہ کرو۔ قبائلی ضلع و پختونخوا ٹی خلوکا قانود ایکشن ان ایڈ آف سیول پاور ئے زوت ایسر کننگِہ۔
جرگہ مُست ئنا پد تموک دود “سورہ” ئے ایسر کننگ نا پڑو کرے و اوغانستان ئٹی مسن تِہ خواننگ نا موکل تننگ نا پارے۔
فیصلہ کننگا کہ بروکا یک شمبے آ دا جرگہ نا خواست آتا حق ئٹی و پختون خطہ ٹی برجاء زوراکی و تادی تا برخلاف غٹ ضلع تا بنجائی جہہ تیا برانز کننگو، کُل پشتونک اسٹ مرسا کمک کیر۔
