ضلع خیبر ئٹی پشتون تحفظ موومنٹ نا راہشون منظور پشتین “پشتون راجی جرگہ” ٹی ہیت کرسا پارے کہ پاکستان نا ساڑی آ قانود ہمو فرنگی تا مُست ئنا جوڑ کروکا قانود ءِ ہراتم او داڑے کوزہ کریسر و کوزہ کروکا ڈیہہ تا مخلوق کن او قانود آتہ جوڑ کریسر۔
او پارے کہ ہمو قانود اینو ہم داڑے ارے و اوٹی جوانی ہتنگ نا ہچ گنجائش اف۔ مسکوہی وزیراعظم تینٹ پاریسس کہ او ہرا قانود آتہ جوڑ کریر او کل پنڈی نا فوجی بنجاہ (جی ایچ کیو) آن بسرہ۔ نن جرگہ آن خواست کینہ کہ او دا بارث ئٹ فیصلہ کیر کہ پشتون آتا ساہ تہ امر رکھنگ مرے۔
منظور پشتین پشتون علاقہ آتیان پاکستانی لشکر ئے کشنگ نا خواست کرے۔او جرگہ ٹی اوار مروکا تیان خواست کرے کہ او فیصلہ کیر کہ فوجی و طالبان ہڑتُما تہ علاقہ آن کشنگ مرے انتئے کہ بے ایمنی نا غٹ آن بھلا سوب اندافک ءُ۔
او پارے کہ پشتون راج فوج، آئی ایس آئی ،ایم آئی “گڈ طالبان” و “بیڈ طالبان” دا کُل ئے دہشت گرد تنظیم پائِہ۔
منظور پشتین پارے کہ قبیلہ غا تا بھلا تہ دا فیصلہ کروئی ءِ کہ “ڈیورنڈ لائن” پشتون آتیکن ہچو حیثیت ئس تخپک۔ ڈیورنڈ لائن نہ تو پشتون آتیکن قانودی حیثیت تخک و نئے کہ دا نا سرکاری حیثیت ارے۔ دا سیم ہن ءَ بر و تجارت کن اندن ملوک مرے ہمر مُست اسک تاکہ پشتون آتا نیام ئٹ ہچ فرخ مف۔
