بلوچستان نا ضلع کیچ ئنا علاقہ گورکوپ ئٹ لشکر کشی برجاء ءِ، اندن تربت آن پاکستانی لشکر اِرا ورنا دزگیر کننگ آن گڈ بیگواہ کرینے۔
حوال تروکا تا پاننگ ءِ کہ گورکوپ نا علاقہ ٹی پاکستانی لشکر پندھ آ مُستی گھام خلنگ ءِ ہرافتہ گن شپ ہیلی کاپٹر آتا کمک ہم تُد ءِ۔
گورکوپ آپریشن ئٹ دائسکان دزگیری یا جانی نسخان نا حوال رسینگتنے و کوالخواہ تا کنڈ آن ہم دا بارث ئٹ ہچ ہیت مونا بتنے۔
ایلو کنڈ آن کیچ ئنا بنجائی شار تربت آن حوال رسینگانے کہ پاکستانی لشکر اِرا ورنا زوراکی ئٹ بیگواہ کرینے۔
حوال تروکا تا رد ئٹ پاکستانی لشکر تربت نا اِرا جتاؤ جہہ تیان اِرا ورنا دزگیر کرسا بیگواہ کرینے ہرا نوربخش نا مار عطاء اللہ و عبدالحبیب نا مار یاسر نا پن ئٹ درست مسنو۔
تومکا ورنا تِہ جتا جہہ تیا اوفتا اُرا تیا چھاپہ خلِسہ زوراکی ئٹ بیگواہ کننگانے۔
حوال تروکا تا پاننگ ءِ کہ پاکستانی لشکر استو چھار ءَ نیم آ شاہی تمپ ئٹ عطاء اللہ نا اُراغا چھاپہ خلِسہ اودے دزگیر کرسا تینتو درینے و چھار ءَ نیم آ بہمن ئٹ یاسر نا اُراغا چھاپہ خلِسہ اودے تینتو درینے ہراکان گڈ تومکا ورنا تا ہچ ڈس اف۔
حوال تروکا تا رد ئٹ پاکستانی لشکر چھاپہ نا وختا چُنا نیاڑی تیا ہم بیدادی کرینے۔
