لسبیلہ پریس کلب حب ئٹی پریس کانفرنس کرسا عبدلحمید نا مار جنید نا ایڑ پارے کہ اینو دا پریس کانفرنس نا مسخت نُم صحافی تتون اوار بندغی حق آتا ادارہ آتا پام ئے دا کنڈ آ ہتنگ ءِ کہ 8 اکتوبر آ نن ئنا دہ بجہ نا وختا حب ئنا جہہ بھوانی شاہ پمپ نا خڑک آن کنا بھلا ایلم جنید حمید ئے مُسہ گاڑی تیا ساڑی اسہ درزن نا کچ سلاہ بند بندغ آک توفنک نا زور آ بیگواہ کرسا تینتو دریر۔
او پارے کہ 28 سالی آ کنا ایلم جنید اندا صنعتی شار حب ئٹی OTsuka پنیئو اسہ کمپنی ئسیٹی پاکستان لمیٹڈ ئٹ کاریم کیک و علاقہ نا بندغ آک ہم دا نا شاہد ءُ کہ کنا ایلم ہچو سیاسی یا مذہبی کاریم تیٹ تُد اف۔
جنید نا ایڑ ئنا پاننگ اس کہ کنا ایلم ئے ہراکان بیگواہ کننگا اوڑے پین بندغ ہم اس و اوفک ننے دا بیگواہی نا حوال ئے سر کریر ہراکان گڈ نن دمدستی پولیس و جہی کوالخواہ تِہ دا زوراکی نا بیگواہی نا حوال ترسا رپورٹ کرفن۔
او پارے کہ مگہ بلوچستان نا الس بندغ افس؟ مگہ جہان نا بندغی قانود آک بلوچستان کن افس؟ مگہ بندغی حق آتا دعویدار تنظیم و سیاسی تپہ غاک یا حکومت آتون انداخس تاغت یا واک اف کہ او زندہ غا بندغ آتہ مڑدہ بندغ جوڑ کننگ نا برخلاف گھام ہرفر؟ مگہ بلوچستان نا الس مُچا زند دا ڈکھ و دڑد تون زند گدریفو۔
جنید حمید نا ایڑ ئنا رد ئٹ بلوچستان ئٹی ہر بندغ نا اسہ ڈکھیائیو کسہ ئس ءِ، کس ئنا مار بیگواہ ءِ تو کس ئنا ایلم، کس ئنا اَرغ بیگواہ ءِ تو کس ئنا خاہوت نا خن تا دید نفسیاتی ناجوڑی تا گواچی مرسا خود کشی آ بیوس ءِ، اندن گمان مریک کہ بلوچستان آ آسیب ئسے نا سیخا ءِ ہرا ہر دے ٹک تون ننا دتر ئے پرنچِسہ ننے جتا ویل آ تا گواچی کننگ ءِ و دافتا ذمہ واری ہمو بندغ آتیا بریک ہرا مخلوق ئے زوراکی نا بیگواہی تا گواچی کیرہ و ہمو بندغ آک ذمہ وار ءُ ہرا دا تادی تیا چُپ ءُ و سئیلی تا کڑد ئے سر تننگ ءُ۔
او ودیک پارے کہ ننا خواست ءِ حکومت و حکومت نا سیکیورٹی ادارہ غاک کنا ایلم ئے آجو کیر و نن بندغی حق آتا جہی و ڈیہی ادارہ تیان خواست کینہ کہ او کنا ایلم جنید ولد عبدالحمید نا زوراکی نا بیگواہی نا نوٹس ہلیر و اونا سر سلامت آجوئی کن ننتو اوار سلیر۔
او پارے کہ پریس کانفرنس نا ایسر ئٹ نن پاننگ خواہنہ کہ اگہ جنید ئے آجو کننگ متو تو نن برانز کننگ آ بیوس مرون۔
