کراچی پولیس بلوچ یکجہتی کمیٹی نا بنجائی آرگنائزر ڈاکٹر ماہ رنگ بلوچ آ سلاہ بند تنظیم آتا کمکاری نا دوبہ ٹی کیس کرینے۔ ماہ رنگ بلوچ نا پاننگ ءِ کہ دننگا چم بازی تیٹ کنے کنا ایمنی ئٹ کروکا جہد آن توننگ کروفس۔
حوال تا رد ئٹ سندھ پولیس ماہ رنگ بلوچ نا برخلاف کس کرینے، و پارینے کہ او آجوئی خواہوک تنظیم آتا کمکاری ئے کیک ہرافتیٹی، بلوچستان لبریشن فرنٹ(بی ایل ایف)، بلوچ لبریشن آرمی(بی ایل اے)، یونائٹڈ بلوچ آرمی( یو بی اے) و ایلو سلاہ بند تنظیم آک اوار ءُ۔
داڑا ماہ رنگ بلوچ چاگڑدی حوالکاری میڈیا غا تینا اسہ پوسٹ ئسیٹی پارینے کہ کراچی ٹی کنے آ اسہ پوسکنو و تینے آن جوڑ کروکو پولیس کیس ئس کننگ دا ہیت ئے پھاش کیک کہ دا ریاست کنا ایمنی ئٹ کروکا کاریم تیان امر بے جاراتی نا گواچی ءِ، خاص وڑ ئٹ ٹائم میگزین نا چاہنداری تننگ آن پد دا نا بےجاراتی ٹی پین ودکی مسنے۔
اونا پاننگ اس کہ دا وڑ ئنا بےقانودی و بےآئینی و زوراکی نا چم بازی تیان کنا ایمنی ئٹ کروکا کاریم تہ توننگ کروفس۔ دا گھام نہ بیرہ کنے بیہار تننگ کن اسہ منظم مہم ئسے نا بشخ ءِ بلکہ ایمن و امان کن سیکیورٹی ادارہ غا تا بےسوبی آن پام ئے مُر کننگ کن ءِ، اندا سوب آن او تینا بےسوبی تا دوبہ ئے ایلوفتیا شاغرہ۔
ماہ رنگ بلوچ نا پاننگ ءِ کہ کنا بلوچ راج، دا ایف آئی آر تا مسخت ننا اشتماعی جہد ئے خطرہ ٹی شاغنگ ءِ۔ واہم، ای دا زوراکی نا گھام تیان خُلیپرہ، کنا راج کنا پد ئٹ مَش ئنا وڑ سلوک ءِ۔ ای دا کیس ئے عدالت ئٹ کھٹوٹ۔
