“ننے اینو سوچوئی ءِ، خوڑتی ئٹ ہُروئی و ٹک خلوئی ءِ کہ پاکستان ارا تاغت آتِہ مونا ہتِسہ تینا مفاد آتہِ اوفتتون اوار گھنڈنگ ءِ” ڈاکٹر نسیم بلوچ پارے۔
بلوچ نیشنل موومنٹ ( بی این ایم ) نا چیئرمین ڈاکٹر نسیم بلوچ پارے کہ ہرا ڈیہہ ہم ننا وسائل آتہ لُٹنگ ئٹ تُد مس نن اونا مونا مزاحمت کرون، چائے او چین مرے یا جہان نا پین بھلو تاغت ئس۔ کس دا سوچپ کہ ننا مزاحمت بیرہ چین ئنا برخلاف مرو۔ اگہ پھگہ دے پین تاغت ئس مرے توبلوچ اودے بیرہ سئیل کروف، کس دا خوش گمانی ٹی مف۔
دا ہیت آتہ او شہید انور ایڈوکیٹ کیچ۔ گوادر ہنکین نا ’ہنکین کونسل‘ نا مجلس ئٹ پارے۔
او پارے کہ مننگ کیک پھگہ دے بلوچستان ئٹی چین ئے باء تننگ کن پین تاغت ئس برے، پاکستان تون بلوچ وسائل نا واپار ئے خلے و اندا سوچِہ کہ بلوچ آک چین ئنا برخلاف مزاحمت کریر و داسا اوفتا برخلاف مزاحمت کروفس۔ ولے دن اف ننا مفاد آتا مونا ہرکس ہم سلیس نن اوڑتون مون ایتون و بلوچ مفاد آتہ رکھون۔
چیئرمین پارے کہ ننا دامون ہیمون گڑاک بدل مننگ ءُ۔ داکان مُست ننا ہمسایہ ڈیہہ تیٹ اندن نا گمان آ بدلی مسنے۔ ہمو ڈیہک ہرافتتون ننا ہُرے نا تعلقداری اس او پوسکنا حالیت آتیکن تیار الوس، ولے داسا ننے دننگا نا گمان آ بدلی تا بارث ئٹ سوچوئی تمو۔ ننے جہان نا حالیت آتِہ پُہہ مروئی تمو۔ ہراڑے نن رہینگنہ، ننے آ اسہ کوزہ گیر ئسے نا حکمرانی ءِ و خطہ نا ایلو راج آتتون مفاد آک اریر دا کل ئے جوانی ئٹ ہُرسہ ننے تینا بروکاتَم ئنا بارث ئٹ سوچوئی تمو۔
او پارے کہ ننے اینو سوچوئی ءِ، خوڑتی ئٹ ہُروئی و ٹک خلوئی ءِ کہ پاکستان ارا تاغت آتہ مونا ہتسہ تینا مفاد آتہ اوفتتون گھنڈنگ ءِ۔ ننے اوڑان مُست ہمو تاغت آتِہ پُہہ کروئی ءِ کہ اگہ بلوچ چین ئے داڑے استحصالی ڈَٹ تیا کاریم کننگ الپک تو ایلو تاغت آک ہم بلوچستان نا بارث ئٹ دہنو تُغ خَنپس۔
چیئرمین ہمسایہ ڈیہہ تا بارث ئٹ پارٹی نا چھانڑدہ سال مُست، اِرا ہزار چھانڑدہ نا سیشن ئٹی جوڑ کروکا پالیسی تا کنڈ آ پام ترسا پارے کہ تینا ہمسایہ ڈیہہ تا بارث ئٹ دہ سال مُست نن ہرا پالیسی تِہ جوڑ کریسُن اینو نن اونا زہم آتِہ خننگ اُن۔ دا پالیسی تیا کاریم کرسا نن مونا بسونن۔ دا ہیت ہم ارے کہ ہر پالیسی نا منفی زہم بی مریک ولے نن و ایلو آزادی خواہوک تنظیم آتیکن دا پالیسی تا گچینو زہم ہم ارے۔
ڈاکٹر نسیم پارے کہ ننا جہد ئنا ماس و مزل پاکستان آن بلوچستان نا آجوئی ءِ۔ ننے تینا ڈغار آ زیات آن زیات بندغ آتِہ آجوئی نا کلہو ئے تروئی ءِ و داڑکن کوشست کروئی ءِ کہ بلوچ گلزمین آ رہینگوکا ننا تِپہ ہم اوار مرے و ننتو اوار سلِہ۔
او پارے کہ گلزمین آ بی این ایم نا کاریم تِہ مونا دننگ کن ننے چُنکا چُنکا ٹولی تیٹ کاریم کروئی ءِ، مخلوق ئے تنظیم و جہد ئنا بارث ئٹ سرپندی تننگ مرے و اندا کاریم ئے ننے تینا ذمہ واری تیٹ اوار کروئی ءِ۔
چیئرمین ڈاکٹر نسیم بلوچ، کیچ ۔ گوادر ہنکین نا سیکریٹری رپورٹ آ بھاز اسُت جَمی نا درشانی کرسا پوسکن گچین مروک واکدار تِہ موارک بادی تس و پارے کہ ای کیہی ذمہ واری تیا جتا تنظیم و ادارہ غا تیٹ کاریم کرینٹ، ڈیہہ ئٹ و ڈیہہ آن پیشن ہم، اینو ہرا رپورٹ ئے نم تسنرے دا ستا کڑزک۔ اومیت کیوہ کہ مُستی داکان ہم گچین کاریم کننگ مرو۔
او پارے کہ تنظیم نا شیفکو ادارہ غا تا سنگت آک کاریم کیرہ اوفتا گچینا کاریم تا بھرم ئٹ بنجائی واکدار تہ سرسوبی رسینگک و اوفتا ستا مریک۔ ننا بنجاہ نا بھاز آ کاریمک ءُ، میڈیا ارے، ہیل کاری نصاب ارے و پین اندنو بھاز گڑا اریر ہرافتیٹی گھامگیج اندا سوب آن مریک کہ شیفکو ادارہ غاک و اوفتا سنگت آک کمک کیرہ و ننا کاریم تیٹ اوار مریرہ۔
چیئرمین پام ترفِسہ پارے کہ پارٹی نا راہبندی ادارہ غا تِہ گچین جوڑ کننگ و اسٹ ایلو تون تفنگ و یکئی ئٹ ہم اوفتِہ منظم کننگ المی ءِ۔ اندن کہ ننا فارن ڈیپارٹمنٹ پیشن ہنِسہ کاریم کیک اودے بندغی حق آتا ڈیپارٹمنٹ آن ہم کمک خواست مریک و میڈیا ڈیپارٹمنٹ نا ہم۔ دا وڑ اسٹ ایلو تون اوار کاریک کننگ ارزان مریک و اوڑدئی دروشم ئس ہلیک۔ ننا کوشست مرے کہ بروکا وخت ئٹ کاریم کروکا سنگت آتیکن کاریمک ارزان مریر۔ نن تینا بروکا وخت ئنا سنگت آتِہ گڑاس کاریم کین ایتن تاکہ او داکان مُستی گھام خلیر۔ دُن مف کہ ننے آن پد بروکا اول آن کاریم بناء کیر۔ داسا نن ہیل کننگ اُن کہ امر ادارہ غاک اسٹ ایلو تون اوار مرسا گچینی ئٹ کاریم کننگ کیرہ، بروکاتم ئٹ ہراتم دافتا بَھرم برو تو نن جوانی و گھامگیج خنون۔
دا توڷ ئٹ کیچ -گوادر ہنکین نا آرگنائزنگ کمیٹی ایسر کننگا و پوسکن گچینکاریک مسر۔ صدر بابا جی آر، کمک صدر بہار بلوچ، سیکریٹری جیئند بلوچ، ڈپٹی سیکریٹری بانک زینل بلوچ و خازن سید بلوچ گچین مسر پدان پارٹی و تحریک تون وفاداری نا سوغند ہرفیر۔
