بلوچستان نا ضلع دکی ٹی استو درست مفروکا سلاہ بند بندغ آک جلہو کرسا کولا کانڑ ئٹبکاریم کروک 20 مزدور کھسفینو و ہفت ٹپی مسنو۔
دکی پولیس نا ایس ایچ او ہمایوں خان ناصر نا پاننگ ءِ کہ درست مفروکا سلاہ بند بندغ آک دا علاقہ ٹی بسر مزدور تیا سمکاری کریر۔
اونا پاننگ اس کہ مزور تیا جلہو آن بیدس سلاہ بند بندغ آک جتا کانڑ تا مشین تِہ ہم ہُشامو ہرافتیٹ دہ انجن اوار ءِ۔
ہندی حوال تروکا تا رد ئٹ دا جلہو استو دکی شار آن خڑک پولیس نا کھیب آ مسنے۔ دائسکان جلہو نا ذمہ واری ئے کس ہرفتنے۔
ایس ایچ او ہمایوں خان نا پاننگ ءِ کہ دا بارث ئٹ پٹ ءَ پول برجاء ءِ۔ جون تِہ پوسٹ مارٹم وبٹپی آتہ جانجوڑی کمک کن ڈسٹرکٹ ہیڈکوارٹر اسپتال دکی آ رادہ کننگانے۔
ضلع ژوب آن تعلقداری تخوکا 6 مزور عبدالمالک، مولاداد، سیداللہ، جلال خان، فضل اور روزی خان نا پن ئٹ درست مسنو۔
ضلع قلعہ سیف اللہ آن تعلقداری تخوکا 4 مزور نصیب اللہ، سمیع اللہ، عبداللہ و نصیب اللہ، نا پن ئٹ درست مسنو۔ اندن ضلع پشین آن تعلقداری تخوکا 3 مزور ملنگ، حمداللہ و عبداللہ، نا پن ئٹ درست مسنو۔
افغانستان آن تعلقداری تخوکا مزور عبدالولی، غلام علی، حیات اللہ اندن
کچلاک آن تعلقداری تخوکا مزور بسم اللہ وبضلع لورالائی آن تعلقداری تخوکا مزور جلات خان نا پن ئٹ درست مسنے۔
ضلع موسی خیل آن تعلقداری تخوک اسہ مزدور صمد خان و ضلع ہرنائی نا تحصیل شاہرگ آن تعلقداری تخوکا مزور ولی محمد نا پن ئٹ درست مسنے۔
