بلوچ اسٹوڈنٹس کونسل پنجاب نا ترجمان تینا شنگ کروک بیان ئٹی پارینے کہ بلوچ خوانندہ غاک داسا دا ڈیہہ ئنا ہچ کنڈ ئسے آ ہم رکھوک افس۔ دا منَہ وخت ئٹی نن خننگ اُن کہ خوانندہ غا تا زوراکی نا بیگواہی تیٹ بھاز ودکی مننگ ءِ، خوانندہ غا تا پروفائلنگ و اوفتہ بیہار تننگ ہڑدے نا کاریم ئس جوڑ مسنے و اوفتا پروفائلنگ ئے کننگ ئٹی یونیورسٹی نا انتظامیہ آن ہلیس لیکچرار و کلرک تسکان کل اوار ءُ۔ و ہر بروکا دے پنجاب ئٹی رہینگوکا خوانندہ غا تا ہڑاند آک و خطرہ آک ودنگ ءُ و دا خطہ ٹی زوراکی نا بیگواہی کون آ بے بندغی و بےقانودی کاریم پین زیات ودنگ ءِ۔
او پارے کہ بیرہ اینخو دنو کیہی تدینی مونا بسنے ہرافتیٹی پنجاب نا جتا شار تیان بلوچ خوانندہ غاک زوراکی ئٹ بیگواہ کننگانو۔ دا تدینی تا برخلاف نن بحثیت بلوچ خوانندہ پلیٹ فارم اول دے آن دشمن عناصر تا برخلاف سلوک ان و سنگت آتا رکھ و سرسلامتی آ ہچ وڑ آ کمپرومائز کروفن۔
ترجمان پارے کہ دا ویل ئنا جاچ ہلنگ آن گڈ نن نمے استو لاہور ئٹ مروکا تدینی نا بارث ئٹ پام ترفنگ خواہنہ کہ استو ریاستی ایجنسی تا کارندہ غاک و پنجاب پولیس پنجاب یونیورسٹی نا ہاسٹل ئٹ بےقانودی چھاپہ خلِسہ اِرا خوانندہ غا بیدادی کریر و دزگیر کرسا تینتو دریر ہرافتان اسٹ ئے پدان یلہ کننگا ولے نوشکی نا جہی ماسٹر فرید نا مار شمریز بلوچ ہرا سپیرئیر یونیورسٹی لاہور نا شعبہ قانود ئٹ خواننگ اس، دائسکان بیگواہ ءِ۔
اونا ودیک پاننگ اس کہ اندا وختا یونیورسٹی آف لاہور ئٹی خوانوکا خوانندہ غا تا ہاسٹل تیا ہم چھاپہ خلنگا و خوانندہ غا تِہ بیم ئنا گواچی کرسا اِرا خوانندہ تاغت نا زور آ بیدادی کرسا تینتو دریر ہرافتیان اسٹ ئے زرہ ئسے آن گڈ یلہ کننگا ولے نوشکی نا جہی یونس بلوچ نا مار دیدگ دائسکان بیگواہ ءِ ہرا کاہور یونیورسٹی ٹی شعبہ زرکاری نا خوانندہ ئس ءِ۔
بیان ئٹ ترجمان پارے کہ بیگواہ کننگوک خوانندہ غا تا سنگت آک دا بارث ئٹ پولیس تون حوال کرینو ولے دائسکان اوفتا بارث ئٹ ہچو معلومداریرسینگتنے۔
او ایسر ئٹ پارے کہ بلوچ خوانندہ غا تا زوراکی نا بیگواہیک اوفتے بے لائخ کننگ نا چم بازی ئس ءِ۔ و ریاست اندا بد نیتی ئٹ دا بےبندغی کاریم ئے ودفنگ ءِ تاکہ بلوچ خوانندہ غاک چائند و خواننگ آن مُر مریر و اوفتِہ اوندھائی ٹی تخنگ مرے۔ ولے داسا بلوچ خوانندہ غاک ریاستی زوراکی و تادی تا مونا چُپ مروفس و تینا بقاء و سرسلامتی کن ہر تلہ غا سلوک مرور۔
