حوال تا رد ئٹ پاکستانی لشکر نا دو آن پنجاب آن اِرا خوانندہ و خضدار نا علاقہ جھاؤ آن اسہ بندغ ئس زوراکی ئٹ بیگواہ کننگانے۔
پاکستان نا صوبہ پنجاب آن رسینگوکا حوال تا رد ئٹ نن نیمہ غا پاکستانی لشکر خوانندہ غا تا ہاسٹل آ چھاپہ خلِسہ بلوچستان نا جہی اِرا خوانندہ دزگیر کننگ آن گڈ بیگواہ کرے۔
بلوچ اسٹوڈنٹس کونسل پنجاب نا رد ئٹ پاکستانی لشکر پنجاب یونیورسٹی نا خوانندہ دیدگ بلوچ ولد یونس و سپیریئر یونیورسٹی لاہور نا خوانندہ شمریز بلوچ ولد فرید بلوچ ئے بے قانودی دزگیر کننگ آن گڈ بیگواہ کرینے۔
بلوچ خوانندہ غا تا کنڈ آن پاکستانی لشکر و پنجاب پولیس نا دو آن ورنا تا زوراکی نا بیگواہی نا ویڈیو ہم تالان کننگانے ہراٹی پنجاب پولیس و سادہ پُچ بینوکو سلاہ بند بندغ خننگ مریک ہرا پن کروک ورنا تِہ بیگواہ کرینو۔
ایلو کنڈ آن بلوچستان نا ضلع خضدار نا علاقہ جھاؤ نا ہند کوڑاسک آن درو سہب ئنا 11 بجہ نا وختا پاکستانی لشکر اسہ ورنا ئسے بیگواہ کرینے ہرا اختر سمالانی نا مار مسلم نا پن ئٹ درست مسنے۔
