حوال تا رد ئٹ خیبر نا علاقہ ٹی پشتون تحفظ موومنٹ (پی ٹی ایم) نا باسک آتیا پولیس مون پہ مون سمکاری کرسا مُسہ بندغ بیران و کیہی تِہ ٹپی کرینے ہرافتیان پنچ ئنا حالیت بھاز خراب ءِ۔ کیہی بندغ آک دزگیر کننگانو۔
شابیتی حوال تا رد ئٹ پی ٹی ایم نا کنڈ آن پشتون راجی جرگہ کن تیاری تا وختا باسک آتیا پولیس مون پہ مون سمکاری کرینے ہراٹی کیہی بندغ آک ٹپی مسنو ہرافتہ اسپتال آ راہی کننگانے، و مُسٹ بیران مسنو۔
چاگڑدی حوالکاری میڈیا غا تدینی نا عکس و وڈیوک تالان کننگانو۔ ہرافتیٹی پی ٹی ایم نا باسک آتیا سمکاری و ٹپی مروکا خننگ مریرہ۔
پی ٹی ایم چاگڑدی حوالکاری میڈیا غا تینا مُسہ باسک ئنا بیران مننگ ئے پک کرینے، و پارینے کہ ننا بیست آن زیات بندغ دا وخت اسکان دزگیر کننگانو۔
یات مرے پی ٹی ایم نا کنڈ آن یانزدہ اکتوبر آ ضلع خیبر نا علاقہ جمرود ئٹی پشتون راجی جرگہ اڈ تننگ نا پڑو کننگاسس ہرا نا مسخت خیبر پختونخواہ ٹی بے ایمنی نا برخلاف جرگہ نا اس۔
پاکستانی حکومت نا کنڈ آن منَہ دے مُست پشتون راجی جرگہ ئے توننگ کن پشتون تحفظ موومنٹ آ رکھ خلنگاسس و تنظیم نا راہشون منظور پشتین تون اوار کیہی باسک آتِہ دہشت گرد پاننگاسس۔
ہراکان گڈ پی ٹی ایم نا باسک آتیا ریاستی کریک ڈاؤن برجاء ءِ، کیہی باسک آک دزگیر ہم کننگانو۔ ولے پی ٹی ایم نا کنڈ آن پڑو کننگانے کہ او ہر وڑ ئٹ پشتون راجی جرگہ ئے اڈ ایتور و پدی مروفس۔
پی ٹی ایم نا کنڈ آن تنظیم آ خلوکا رکھ ئنا برخلاف پشاور ہائی کورٹ ئٹی خواست ئس ہم تننگانے۔
پی ٹی ایم نا کنڈ آن پڑو کننگوک پشتون راجی جرگہ ئے توننگ کن ریاستی کریک ڈاؤن دائسکان برجاء ءِ۔
