بندغی حق آتیکن کاریم کروکا اقوام متحدہ نا خاص نمائندہ میری لالر ماہ رنگ بلوچ آ سفری رکھ خلنگ نا تدینی آ افسوس کرسہ پارینے کہ پاکستانی ادارہ آتا کُنڈ آن ماہ رنگ بلوچ ئے امریکہ غا سفر کننگ آن توننگ و پدا اودے بیہار تنّنگ، دڑکّو تنّنگ نا حوال آ افسوس ءِ۔
ہندا وڑ پورپی ڈیہہ آئرلینڈ نا شار ڈبلن ئٹی اسہ پین بندغی حق آتیکن کاریم کروک تنظیم، ‘فرنٹ لائن ڈیفینڈرز’ ہم داڑا پارینے کہ نن ڈاکٹر ماہ رنگ بلوچ تون مروکا تدینی آ افسوس کینہ و پاکستانی ریاست آن خواست کینہ کہ او اونا اوڑے آزات سفر کننگ و رکھ ئنا حق آتہ ایتِہ۔
ایلو کنڈ آن پاکستانی و جہانی حق آتا ادارہ آک دا تدینی نا سخت مذمت ئے کرسہ ریاست آن ماہ رنگ بلوچ نا پاسپورٹ و ایلو گِڑاتہ اودے تننگ نا خواست کرینو۔
ہیومن رائٹس کمیشن آف پاکستان ایف آئی اے نا دا کاریم آ افسوس کرسہ پارے کہ بندغی حق آتا جہدکار تا برخلاف دا وڑ ئنا زوراکی تِہ منّپنہ۔ اودے سفر آن توننگ اونا درشانی نا آجوئی و ہِن ءَ بر نا حق ئنا چَٹ لتاڑ ءِ۔
او پارے کہ ڈاکٹر ماہ رنگ بلوچ زوراکی ئٹ بیگواہ کننگوک بندغ و بےقانودی ئٹ بندغ آتِہ کھسفنگ نا برخلاف تینا سیاسی جہد آن درست مریک، ہندا سوَب آن اونا جہانی تیبر آ پِن ئس ارے۔
تنظیم دا ہیت آ زور شاغا کہ ریاست ماہ رنگ بلوچ ئے آزات و رکھ ئٹ سفر کننگ نا موکل تے۔
ایلو بندغی حق آتا تنظیم آک پاکستانی ریاست نا کنڈ آن بلوچ راہشون ڈاکٹر ماہ رنگ ئے ٹائم میگزین نا انعامی مجلس ئٹی بشخ ہلّنگ آن توننگ آ افسوس کریر۔
