بلوچ نیشنل موومنٹ نا ترجمان تینا شنگ کروک بیان ئٹی پارے کہ پاکستانی ریاست ایمنی ئٹ سیاست کروکا تنظیم و اوفتا باسک آتا برخلاف بے سوَب ریاستی تاغت کاریم ئٹ ہتنگ ءِ۔ پشتون راجی جرگہ ٹی ہڑاند ودی کننگ کن پشتون تحفظ موومنٹ ( پی ٹی ایم ) ئے حکومت پاکستان کالعدم پارینے۔ جہانی تیبر آ پنی آ بندغی حق آتا سروک ڈاکٹر ماہ رنگ بلوچ ئے ٹائم میگزین نا اسہ مجلس ئسیٹی اوڑدئی کن امریکہ غا ہننگ آن تورِسہ اونا پاسپورٹ ئے پُھلنگ مس۔ دا تومکا تدینیک پاکستان ئٹی بیوس آ راج آتا حالیت ئے پھاش کیرہ۔ بلوچ و پشتون آتا برخلاف پاکستانی حکومت نا پن کروک کارروائیک دا ہیت ئے پھاش کیرہ کہ ریاست پاکستان ئٹی پشتون و بلوچ راج کُل بندغی حق آتیان پد تموک ءِ۔
او پارے کہ پی ٹی ایم تدوکا 8 سال ئٹی چرجوئی ئٹ ایمنی ئٹ جہد کرینے۔ پی ٹی ایم پشتون وطن ئٹی ریاستی و بے ریاستی عناصر تا دہشت گردی ٹی حساب مروک کارروائی تا برخلاف اسہ سوگوؤ السی تحریک ئس جوڑ مسنے ہرا نا باسک آک سخت ریاستی کریک ڈاؤن و بیدادی سگِسہ ہم ایمنی ئٹ جہد کرینو۔ داکان ویتہ ہم حکومت پاکستان اوڑا رکھ خلکنے۔ خلیس ءِ کہ 11 اکتوبر آ ’پشتون راجی جرگہ ‘ ئے ہم تاغت کاریم ئٹ ہتسہ توننگ نا کوشات کننگو ہمر کہ گوادر ئٹی بلوچ یکجہتی کمیٹی نا مُچی ( راجی مچی ) ئے توننگ نا کوشست کننگا ہرا نا بھرم ئٹ ایمنی ئٹ برانز کروکا مخلوق ئے دزگیر کننگا، شہید کننگا و ریاستی لشکر السی مڈی تِہ نسخان تس۔
اونا پاننگ اس کہ نن پشتون تحفظ موومنٹ تون اوار سلوک اُن ہرا پشتون آتا حق کن ایمنی ئٹ جہد کروکو اسہ تحریک ئس ءِ۔ بی این ایم ہر تیبر آ پشتون راج ئنا سواد آتیکن و خاص وڑ ئٹ پی ٹی نا مخ تفی ئے برجاء تخو۔ دا ایمنی ئٹ جہد کروک تحریک نا باسک آتہ ریاست پاکستان نا کنڈ آن چرجوئی ئٹ بیم ئنا گواچی کننگ مننگ ءِ۔ کیہی باسک آک دزگیر کننگانو و کیہی تہ ٹک کرسا شہید کننگانے۔ ہر بندغ نا حق ءِ کہ او تینا حق و سیاسی مسخت کن تنظیم جوڑ کے و ایمنی ئٹ جہد کے۔
بی این ایم نا ترجمان پام ترفِسہ پارے کہ جہانی کہول ئے بلوچستان و پشتونخوا ٹی بندغی حق آتا لتاڑ و پشتون و بلوچ قوم ئنا حالیت آ دمدستی پام تننگ نا خواست ءِ۔ پاکستان نا کنڈ آن بندغی حق آتا لتاڑ آ جہانی کہلو نا چُپی پاکستان ئے شہہ تننگ ئٹی ءِ۔
او پارے کہ ڈاکٹر ماہ رنگ بلوچ و سمی دین بلوچ کون آ بندغی حق آتیکن کاریم کروکا، ہرافتا کڑد ئے جہانی تیبر آ منّانو، پاکستانی ریاست آن برداشت مفسہ۔ ڈاکٹر ماہ رنگ ئے جناح انٹرنیشنل ائرپورٹ کراچی آن ڈنی ڈیہہ آ سفر آن تورِسہ اونا پاسپورٹ ئے پُھلنگ مس۔ ہچو قانودی سوب اودے پاننگ متو و پدان ہراتم او سمی بلوچ تون اوار واپس ہِننگ اس تو اودے تورِسہ بیدادی نا گواچی کننگا، اونا گاڑی نا کلید آتِہ کشِسہ اوفتہ ویرانو کسر ئسے آ الار۔ دا تدینی نا برخلاف بلوچ راج ئٹی بھاز خار ودی مسنے۔ دا اسہ اندنو تدینی ئس ءِ ہرا وار وار سیاسی باسک آتون مننگ ءِ۔
ترجمان پارے کہ نن ریاست پاکستان ئےہم خبڑدار کینہ کہ او خاخر تون گوازی کننگ ءِ۔ منظور پشتین، ڈاکٹر ماہ رنگ بلوچ و سمی دین بلوچ کون آ بندغ آک بیوس آ راج آتا میراث آکو و راجی توار آکو، دافتہ چُہ کرفنگ نا کوشست آ اودے سخت ردعمل تون مون تروئی تمو۔
