بلوچ نیشنل موومنٹ (بی این ایم) نا بندغی حق آتا ادارہ پانک تینا ستمبر 2024 نا رپورٹ ئے شنگ کرسا بلوچستان ئٹی بندغی حق آتا لتاڑ ئٹ ودکی آ روشنائی شاغا۔
رپورٹ ئٹی زوراکی نا بیگواہی تا 41 تدینی، 3 ویتہ عدالت و قانود کھسفنگ و 25 بندغ آ بیدادی نا تدینی رپورٹ کننگانے۔رپورٹ نا رد ئٹ دا زیمی مروکا بندغ آتِہ پاکستانی لشکر و انٹیلی جنس ایجنسیک ٹک کرینو۔
پانک دا تادی تا مذمت ئے کرسا پارے کہ زوراکی نا بیگواہیک، ویتہ عدالت کھسفنگ آک، بلوچ شاری تتون بےبندغی روشت پاکستانی لشکر نا کنڈ آن بلوچ الس ئنا برخلاف ہامدیکا بیدادی نا مہم ئے پھاش کیک۔ دا بیرہ بندغی حق آتا لتاڑ اف بلکہ اسہ منظم زنک کشی ئس ءِ ہرا دمدستی جہانی مداخلت نا خواست کیک۔
تنظیم ودیک فریشانی نا درشانی کرسا پارے کہ زورائی ئٹ بیگواہ کننگوک بندغ آتیٹ کیہی بندغ آتِہ بھاز تادی تتون مون تروئی تمک۔ زوراکی نا بیگواہی تاگواچی مروک بندغ آتا جون تِہ خسنگ مریک۔
بیگواہی تیان بیدس، رپورٹ ئٹی اِرا ایلم، بیس سالی آ محمد اسماعیل و 17 سالی محمد عباس نا کھسفنگ نا شابیت آتِہ تننگا، ہرافتِہ پاکستانی سیکیورٹی فورسز آک کلات ئٹی اوفتا اُراغان بیگواہ کریر و پدان کھسفیر۔ اسہ پین کیس ئسیٹی حکمت اللہ بلوچ وار ءِ، ہرادے نوشکے ٹی ایمنی ئٹ برانز نا وختا سم لگاسس و او ستمبر نا تُو ئٹی کراچی نا اسہ اسپتال ئسیٹی ٹپ آتیان درواخ مفننگ نا سوب آن کذیت کرے۔
پانک پاکستان نا کنڈ آن فورتھ شیڈول پالیسی ئے کاریم ئٹ ہتنگ آ ہم پام ترفے و پارے کہ داٹی ہزار آ سیاسی باسک، خوانندہ، ڈاکٹر و پیشہ ور بندغ آتا آجوئی نا مخ تفی کروکا تِہ سلاح بند تنظیم آتون تعلقداری نا دروغ ئنا دوبہ ٹی اوار کننگانے۔
رپورٹ ئٹی پاننگا کہ، دا پالیسی ایمنی ئٹ جہد کروکا تیا ظلم و تادی تِہ قانودی دروشم تسنے، و ریاستی لشکر نا دو تِہ ویتہ سوب آن اوفتِہ دزگیر کننگ، بیدادی کننگ و کھسفنگ کن یلہ الانے۔
پانک تینا خواست ئٹ پارے کہ نن عالمی کہول آن خواست کینہ کہ او جنگی ڈوہداری تا پٹ ءَ پول ئے کے و پاکستانی ریاست ئے بلوچ زنک کشی نا ذمہ وار پائے۔
