بلوچ لبریشن آرمی نا جارکش جیئند بلوچ میڈیا ٹی شنگ کروک تینا درشان ئٹی پارینے کہ تنظیم نا ایلیٹ فدائی یونٹ،مجید برگیڈ درو ننکان کراچی ٹی جناح ائیر پورٹ آن پیشتموکا چینی انجینئر و سرمایہ کار آتا اَسہ بھلو کاروان ئسے فدائی جلہو ئٹی ٹک کرسا پنچ آن زیات چینی انجینئر و سرمایہ کار خلک و دوانزدہ آن زیات ٹپی کرے۔ اوفتا رکھ کروک پانزدہ پاکستانی لشکری کارندہ کھسکُر و کیہک ٹپی مسُر، ہرافتیٹ پاکستانی لشکر و ڈھکوک ادارہ آتا چھار بندغ آن زیات بڑزکو تیبر نا افسر اسر۔
او پارے کہ تراک ئنا سوب آن کاروان ئٹی اوار پانزدہ لاری بُھس مسُر۔ بی ایل اے نا گچین حکمت عملی نا سوب آن، بندغی آتا زیات مُچی مروکو ہند ئسیٹی مننگ آن ویتہ ہم تراک ئٹی لس شاریک جانی آن بچھار۔ لغور آ دژمن ہر وار ئنا وڑ دا سرسوب جلہو ئے ڈھکنگ کن اودے آئل ٹینکر تُدینی پاننگ نا کوشست کرے، واہم اودے بےسوبی تون مون تروئی تما۔ دا بی ایل اے نا ہمو دعوی غا تَہ پک کیک کہ بلوچستان ئٹی تینا لشکر نا تموکا مورال و بےسوبی تِہ خنِسہ دژمن لشکر پاکستان چرجوئی ئٹ تینا نسخان تِہ ڈھنکنگ نا کوشست کننگ ءِ۔
اونا پاننگ اس کہ دا کاروائی ئے بی ایل اے، مجید برگیڈ نا جند ندر سنگت شاہ فہد عرف آفتاب سر تس۔ بلوچ لبریشن آرمی دا جلہو نا زمہ واری ئے ہرفک۔
جارکش پارے کہ دا جلہو پاکستان و چین ئنا پارہ غان بلوچ راج ئنا برخلاف برجاء کوزہ، جبر، استحصال و راجی مڈی تا لُٹ پل نا رد عملی ئٹی کننگانے۔ ننا دا کاروائی دا ہیت ئنا پیدواری ءِ کہ بلوچ راج تینا سرزمین، تینا وسائل و تینا آجوئی کن بش مننگ نا فیصلہ کرینے۔ دژمن ہخس تاغت تخِہ، نن ہچ دروشم ئٹ تینا سرزمین آ مروکا ظلم و استحصال و کوزہ ئے وسیک سگوفن۔
او پارے کہ چین و پاکستان بلوچستان نا نہادی آ مڈی، اندن کہ ریکورڈک نا خیسُن و تانبہ نا کان، سیندک نا معدنی مڈی و گْوادر نا کُڑمب آ سمندری بندرگاہ ئے دوئی کننگ کن تینا استحصالی ڈٹ تِہ تُرند کرینو۔ اوفتا پارہ غان بناء کننگوکا سی پیک نا ڈٹ بندی بلوچ آتے گیشتر غلامی ٹی شاغنگ و ننا قدرتی مڈی تا لُٹ پل نا چم بازی ئس ءِ۔ دا ڈٹ بیرہ اقتصادی پراجیکٹ اف، بلکن ننا زمین و ننا بقاء آ اسہ بھلو جلہو ئس ءِ۔
جارکش پارے کہ بلوچ لبریشن آرمی چین ئے مالو 90 دے ئنا الٹی میٹم تسس کہ او بلوچ راج ئنا برخلاف پاکستان تون اوار تینا بے قانودی اواری ئے ایسر کے و بلوچستان نا کل ڈٹ، سرمایہ کاری و لشکر ئے ولدا توار کریفِہ۔ مگہ چین ننا دا واضح و سخت وارننگ ئے نظر انداز کرے و پاکستان نا مخ تفی ئے کرسا ننا مڈی تیا تینا کوزہ ئے سوگو کننگ نا کوشست برجاء تخا۔اینو نا جلہو دا ہیت ئنا ثبوت ءِ کہ نن تینا سرزمین آ ڈن ڈیہی تقغت آتِہ کوزہ کننگ ایلوفن۔ و دژمن ئے نن ہر وخت و ہر جاگہ غا دک خلنگ نا تاغت تخِنہ۔
او پارے کہ دا تومکا ڈیہک بلوچ اُلس ئنا آجوئی نا تحریک ئے توننگ کن اوار مرسا کاریم کننگ ءُ و اوڑکن ہر وڑ ئنا جارحیت و ظلم کاریم ئٹ ہتنگ ءُ۔ ولے او اُستان درینو کہ دا جہد اوفتا کروڑ آ ڈالر آتا پوسکُنا سیکیورٹی ڈٹ و سرمایہ کاری آن کیہی زیات سوگو ءِ۔
مُستی پارے کہ بی ایل اے سخت لوزارتیٹی چین ئے دوارہ خبڑدار کیک کہ اگہ اوفک زوت بلوچستان آن تینا بے قانودی ڈٹ بندی تِہ ایسر کے و بلوچ آتا برخلاف پاکستان تون تینا سیوتی ئے ایسر کتو اودے پین ترندی ئٹ جلہو تتون مون تروئی تمو۔ نن چین ئنا کُل معاشی سواد، سرمایہ کاری و لشکری ماڑی تِہ ٹک کرون و او دا پُہہ مریر کہ بلوچستان نا سرزمین اوفتیکن رکھکوک پناہ گاہ ئس مروف۔ اینو نا جلہو ہمو چرجوئی نا بشخ ءِ، ہرانا بناء 11 اگست 2018 ئٹی فدائی ریحان اسلم بلوچ دالبندین ئٹی چینی انجینئیر آتا کاروان آ فدائی جلہو کرسا کرے۔
او پارے کہ دا نہ بیرہ چین کن وارننگ ئس ءِ، بلکہ جہان نا ہر ہمو راج و سرمایہ کار کن ءِ، ہرا بلوچستان ئٹی پاکستانی کوزہ نا وخت آ گام تخنگ نا کوشست کیک۔ نن کس ئسے ہم تینا مڈی و الس نا بروکاتم ئے پُلنگ نا اجازت تفنہ، ایسکان کہ بلوچ راج آجو متنے۔ جہانی مخلوق ئے یاد تخوئی ءِ کہ بلوچستان نا سرزمین و اونا مڈیک بیرہ بلوچ الس ئنا ءُ، و نن ہر نہاد آ تینا حق و آجوئی نا رکھ ئے کرون۔
جارکش پارے کہ پاکستان و چین ئے چائنگ خواہک کہ اوفک تینا مفاد آتا رکھینگ کن اخس خرچ کیر، ننا جذبہ آجوئی ئے ایسر کننگ کپسہ۔ نن تینا آجوئی نا رکھ کن ہر وڑ و ڈول ئے کاریم ئٹ ہتون و تینا الس نا برخلاف مروکا زوراکی تا ورندی ایتون۔ و ہرا توغت آک ننا سرزمین و مڈی تیا کوزہ کننگ نا کوشست کرور او تینٹ تینا تباہی نا سوب مرور۔
کراچی ٹی دشمن آ سرسوب فدائی جلہو کروکا سرمچار، مجید بریگیڈ نا جانباز فدائی شاہ فہد بادینی اسک۔ فدائی سنگت شہید شاہ فہد بادینی عرف آفتاب ولد میر فضل خان بادینی نوشکی نا ہند کلی بادینی نا تولوک ئس اسک۔ او 2019 آن بلوچ لبریشن آرمی تون اوار اس، تینا مخلصی و دلیری نا کُل خاصیت آتون سنگت شاہ فہد عرف آفتاب ہر وخت جوانی ئٹ تینا فرض آتے پورو کرے۔ بیست و ہشت سالی آ شہید شاہ فہد بادینی لسبیلہ یونیورسٹی ٹی بی بی اے نا شعبہ ٹی خواناسس۔ شہید شاہ فہد 2021 بی ایل اے مجید بریگیڈ ئے تینا رضا ئٹ تینا خدمت آتے تس۔ مُسہ سال نا ودار و تربیت آن پد اودے اسہ سال ئس مُست دا مشن تننگا۔ شہید شاہ فہد بی ایل اے نا انٹیلی جنس ونگ” زراب” تون کاریم کرسا، تینا شورہ آن پُر اُلاخ ئے دشمن نا کاروان تون سرسوبی ئٹ خلک، دا ہائی پروفائل مشن ئے سخت بہادری و عقلمندی ئٹ سرسوب کرے۔
جارکش مونی پارے کہ بی ایل اے نا دا مشن ئے سرسوب کننگ ئٹ بی ایل اے نا انٹیلیجنس ونگ” زراب” نا بھلو کڑدار ئس اسک۔ بلوچ لبریشن آرمی تینا انٹیلیجنس ونگ زراب نا پن ئنا پڑو کیک۔ زراب( Zephyr Intelligence Research &Analysis Bureau) بی ایل اے نا منظم و سوگو انٹیلی جنس ونگ ءِ، ہرا کیہی ریسرچرز، انفارمرز، آئی ٹی ایکسپرٹس، ڈیٹا انالسٹ و پٹ و پولکار آتون کاریم کیک۔ زراب بلوچستان نا کُل چنکا بھلا شار تیٹ اڈ تننگانے۔ بی ایل اے نا دا بے توار انگا سپاہیک دشمن نا کُل ادارہ غا تا تہٹی پیہنگ ئٹ سرسوب مسونو۔
جارکش پارے کہ بی ایل اے دا وختا مجید بریگیڈ نا اِرا ہندنو فدائی تا پن تا پڑو کیک، ہرا استو نا مشن نا اولیکو بشخ ئٹی اوار اسُر۔ رازداری نا اصول آتا رد ئٹ دا مشن نا اولی بشخ ئنا حوالک ڈکھنگاسُر۔ دا مشن نا اولیکو بشخ ئے فدائی صدام بلوچ و شہید فدائی سنگت سہیل بلوچ سرسوبی ئٹ سر ترسا شہد مسر۔
شہید فدائی سنگت صدام بلوچ عرف فرید ولد باہوت بلوچستان نا ہند پسنی نا تولوک ئس اسک۔ فدائی سنگت صدام 2021 ئٹی بلوچ لبریشن آرمی تون اوار مس و اسہ سال ئسے آن پد بی ایل اے مجید بریگیڈئے تینا خذمت آتِہ تس۔ شہید سنگت صدام بلوچ بی ایس کریمنالوجی نا خوانندہ ئس اسک۔ فدائی صدام بلوچ گچین جنگی لائخی تا خواجہ اسک۔ تینا مشن ئے سرجم کننگ کن کیہی تو اسکان “زراب” تون اوار مرسا کاریم کرے و مشن نا اولیکو بشخ ئے سرسوب کننگ کن تینے ندر کرے۔
جارکش پارے کہ شہید فدائی سنگت سہیل عرف بابا ولد عبدالمجید پنجگور نا ہند خدابادان نا جہیس اسک۔ گریجویشن نا سند ئے ہلوکا شہید سنگت فدائی سہیل 2017 آن بی ایل اے تون اوار اسک و 2022 ٹی بی ایل اے مجید بریگیڈ ئٹ اوار مس۔ شہید سہیل جنگی لائخی تا خواجہ و کثیرالجہتی سنگت ئس اسک۔ شہید سہیل تینا ہفت سال ئنا راجی جدوجہد ئٹی شاری نیٹورک، مشی محاذ، مجید بریگیڈ زراب ئٹی کاریم کرے و کُل یونٹ آتیٹی تینا محنت و گشاد ئٹ جوانو چیدہ تخا۔
او پارے کہ ننا جہد ہموتم اسکان برجاء مرو، ہراتم اسکان بلوچ راج تینا آجوئی و خواجئی ئے دوئی کتنے۔ دا اسہ پھاشو کلہو ئس ءِ کہ پاکستان و چین ئنا ننے آ چٹی کروکا جنگ ئے نن تینا تاغت و عزم ئٹ بےسوب کرون۔ ہمو دے مُر اف کہ بلوچستان آجو مرو و کُل ہمو کوزہ گیر آتا پن و نشان ایسر مرو۔
اونا پاننگ اس کہ بی ایل اے نا عزم ءِ کہ نن تینا الس ئنا آجوئی و تینا مڈی تا رکھنگ کن جنگ کرسا کرون۔ امرو تاغت ئس مرے پاکستان یا اونا سیوتیک، ننے تینا سرزمین و آجوئی آن مُر کننگ کپک۔ ننا کلہو ساف ءِ کہ یا کوزہ گیر تاغت آک ننا ڈیہہ ئے الیر یا بلوچ راج ئنا ورندی جلہو کن ودار کیر۔
او ایسر ئٹ پارے کہ دا جنگ ئے نن تینا آجوئی کن بناء کرینن و دانا ایسر بیرہ بلوچستان نا آجوئی آ مرو۔
