“بلوچستان ئٹی مُد ئنا بدلی نا بندغی حق آتا لتاڑ تون تعلقداری ارے، ہرا تینٹ استعمار نا ودی کروک ءِ۔” یوسف بلوچ
جنیوا سوئٹزرلینڈ ئٹی بلوچ نیشنل موومنٹ نا بھلُنی ٹی پنچمیکو جہانی بلوچستان کانفرنس ئٹی مُد و بندغی حق آتا باسک یوسف بلوچ بلوچستان نا جہد آجوئی و جہانی مُد ئنا بدلی تا نیامٹی تعلقداری ئے پھاش کرے۔
ہیت کننگ نا وختا او بلوچستان ئٹی بندغی حق آتا لتاڑ نا زوراکی نا بیگواہی و بیدس عدالت بندغ آتِہ کھسفنگ نا ویل آ تیا روشنائی شاغا و بے انصافی تا استعمار و سرمایہ داری نا زہم آتا تعلقداری نا درشانی کرے۔
یوسف بلوچ پارے کہ بلوچستان نا جہد ئنا مُد ئنا بدلی تون کُڑمبو تعلقداری ئس ءِ۔ ہراتم نن بلوچستان ئٹی بندغی حق آتا لتاڑ، اندن کہ زورانسری بیگواہی و بیدس قانود بندغ آتِہ کھسفبگ نا ہیت ئے کینہ گُڑا دا پھاش مریک کہ دا بھلا ویل آک مُد ئنا بدلی تون اوار تفوک ءُ، ہرا تینٹ سرمایہ داری نا استعمار نا ودی کروک ءِ۔ بلوچستان پاکستانی ریاست نا کالونی ءِ۔ دا ننکن بھاز اہم ءِ کہ نن دا زوراکی آ ساڑی نظام ئے ایسر کین و اونا ادارہ غاتِہ ایسر کین تاکہ دا ہیت پک مرے کہ بلوچستان نا ہندی بندغ آک، جہان نا ایلو برادری تون اوار آجوئی دوئی کننگ کیر۔
یوسف بلوچ بلوچستان نا ہندی بندغ آتا نمائندگی نا اہمیت آ پارے کہ دا ہیت آ زور تننگ المی ءِ کہ دا ننا سرزمین ءِ، نن دا ڈیہہ ئنا بھاتیک اُن و نن دا نا خواجہ غاک اُن۔ نن پین کس ئنا خواجہی و دو ئنا شیفا رہینگپنہ۔ ننے دا واکدار آتا برخلاف مزاحمت کروئی ءِ۔
او دا تحریک ئٹی ورنا تا گیشتر اوار مننگ آ زور ترسِہ ودیک پارے کہ بلوچستان نا آجوئی و انصاف نا جُہد ئٹی ورنا تِہ گیشتر اوار کننگ المی ءِ تاکہ دا ہیت ئے پک کننگ مرے کہ ننا مسخت نا جُوان راہشونی مننگ ءِ۔ بلوچستان نا جہد چائے کس ئنا بیگواہ کننگوک سیال، سنگت یا کس ہندنو بندغ ئسے نا زریعہ ئٹ مرے ہرادے پاکستانی ریاست بےگواہ کرینے یا کھسفینے۔
یوسف بلوچ ہیت کرسا ایسر ئٹ تحریک ئے مُرغنو وخت اسکان برجاء تخنگ نا اہمیت آ پارے کہ دا ویل آک مَنہ سال ئٹ ایسر مفسہ۔ ننے بے انصافی تیان خار ئنا درشانی کروئی ءِ، اوار ننے جواننگا بروکاتم نا امیت ئے ہم کروئی ءِ۔ خار و امیت تومکا تِہ اَسہ کچ کننگ آن ہی نن گواچنی بنداو آ بدلی ہتنگ نا وڑ و اختیار تِہ دوئی کننگ کرون۔
یوسف بلوچ، بلوچستان آن تعلقداری تخوک مُد و بندغی حق تا باسک ئس ءِ و فرائیڈے فار فیوچر نا بلوچستان ہنکین کن کاریم کیک و فرائیڈے فار فیوچر انٹرنیشنل ئٹی ہم کاریم کننگ ءِ۔ او چُنکا سن ئٹی تینا کاریم تِہ بھاز جوزہ ئٹ بناء کرے۔ ہرا مُد ئنا بدلی آ بھاز زہم تخوک اونا زاتی آزموندہ غا تا بنداو آ اسر۔
