پاکستانی وزارت داخلہ نا کنڈ آن یک شمبے نا دے شنگ مروک نوٹیفکیشن نا رد ئٹ پشتون تحفظ موومنٹ آ سخت شاہدی تا رد ئٹ رکھ خلنگ نا فیصلہ کننگانے۔
وزاعت داخلہ نا پاسو آن شنگ مروک نوٹیفکیشن ئٹی پاننگانے کہ ’پی ٹی ایم ڈغار دشمن بیانیہ و انارکی (بے مہار سیاسی تتڑ بتڑ) تالان کننگ ئٹ تُد ءِ۔ نوٹیفکیشن شنگ مننگ آن گڈ داسا داڑا عملدرآمد کننگو۔
پی ٹی ایم نا پاننگ ءِ کہ اونا کور کمیٹی نا مجلس برجاء ءِ ہراکان گڈ دا ویل آ اسہ بیان ئس شنگ کننگو۔
اِرا دے مُست چار اکتوبر آ پشاور ہائی کورٹ پی ٹی ایم نا کنڈ آن ضلع خیبر ئٹی اڈ ہلوک قومی جرگہ نا بارث ئٹ پاریسس کہ ’جرگہ مرے ولدا ہرون کہ دا انت کیرہ۔
پی ٹی ایم نا قومی جرگہ نا برخلاف ضلع خیبر نا خاطراللہ پنیئو جہی بندغ ئس پشاور ہائی کورٹ ئٹی خواست تسس ہراٹی جرگہ ئے توننگ نا پاننگاسس۔ قومی جرگہ نا برخلاف خواست ئے جمعہ نا دے پشاور ہائی کورٹ نا جسٹس سید ارشد علی و جسٹس وقار احمد نا اِرا باسکی بینچ بِنگ۔
خواست کروک نا پاننگ اس کہ پاکستان جوڑ مننگ آن پد ڈیہہ ئٹ عدالت آک ساڑی ءُ و ضلع غا تیٹ ہم عدالت آک جوڑ مسنو۔ پی ٹی ایم نسل پرستی نا بنداو آ ضلع خیبر ئٹی پشتون نیشنل کورٹ نا پِنا عدالت اڈ تننگ خواہک ہرا نا بَٹنگ نامہ ہم شنگ کننگانے۔
او پارے کہ انتئے کہ جرگہ و پنچایت نا فیصلہ بے بندغی سزا تیا ساڑی مریک تو عدالت پی ٹی ایم نا 11 اکتوبر نا جرگہ ئے تورِہ۔
داکان مُست 1 اکتوبر آ پی ٹی ایم نا پاننگ اس کہ سئے شمبے نا ننکان پشاور پولیس ضلع خیبر نا علاقہ جمرود ئٹی پشتون راجی جرگہ نا جلسہ جاہ آ چھاپہ خلکنے و پولیس و پی ٹی ایم نا باسک آتا نیامٹ جھڑپ مسنے۔
پی ٹی ایم نا راہشون منظور پشتین تینا شنگ کروک بیان ئٹی پارے کہ پشاور پولیس نا چھاپہ نا وختا سمکاری و شیلنگ ہم کننگاسس ہراڑان کیہی باسک آک ٹپی مسوسر و گدان تِہ ڈھرفنگاسس۔
منظور پشتین نا بیان ئٹ پاننگاسس کہ پولیس نا چھاپہ غان گڈ ننا بندغ آک دوارہ جلسہ جاہ آ گدان خلکر ہراڑا دوارہ پولیس شیلنگ و سمکاری کرے ہرا نا وڈیوک ہم چاگڑدی حوالکاری میڈیا غا تالان ءُ۔
یات مرے پی ٹی ایم 11 اکتوبر آ ضلع خیبر ئٹی تیبہ صوبہ ٹی برجاء بےایمنی نا برخلاف ’پشتون قومی جرگہ/عدالت‘ نا پنا اسہ جرگہ ئس اڈ تننگ نا پڑو کریسس۔
دا جرگہ کن خیبر پختونخوا و بلوچستان آن کل سیاسی تپہ غا تا سروک، قوم پرست و ایلو جتا سروک آتِہ اوڑدئی کن بٹنگانو۔
دا جرگہ ئے مُسہ دے برجاء سلوئی ءِ ہرا نا شیڈول نا ہم پڑو کننگانے ہراٹی مُسہ دے بٹنگوکا جرگہ نا باسک آتا کنڈ آن جتا توڷ مرو و دا علاقہ نا ویل آتیا تران مرو۔ جرگہ کن خیبر نا علاقہ ریگی للمہ ٹی گدان خلنگاسس۔
منظور پشتین چھاپہ آن گڈ شنگ کروک تینا بیان ئٹ پاریسس کہ دنیا نا مُچا تاغت اوار مرسا ہم ننا جرگہ ئے توننگ کپک و نن تینا جرگہ ئے کرون۔
