بلوچ یکجہتی کمیٹی نا راہشون ڈاکٹر ماہ رنگ بلوچ شبیر بلوچ نا زورانسری بیگواہی ئے ہشت سال پورو مننگ آ پارینے کہ زور ئنا بیگواہیک بلوچستان آ نالت ءُ دا بیرہ زیمی مروکا تہ نہ بلکہ ہزار آ خاہوت آتا زند ئے ویران کیرہ۔
او پارے کہ شبیر بلوچ اسہ خوانندہ راہشون ئس ءِ، ہرادے ہشت سال مہالو فوج زور ئٹ بیگواہ کرے و داسکان اونا ہچ ڈس اف۔ اونا ایڑ سیما اونا سرسلامت آجوئی کن بھاز جہد کننگ ئٹی ءِ، تینا ہڑتُما چُنا میراس و شاری ئے کسر تا زیہا بھلُن کننگ ئٹی ءِ۔
او پارے کہ شبیر نا زائیفہ زرینہ ئے ہِچ ڈس رسینگنگ ئٹی اف کہ او اونا زائیفہ ءِ یا جنوزان ءِ۔ داکان زیات ڈکھ ئنا ہیت دا کہ اودے بیگواہ مننگ آ خنسہ او زہنی بھاز زیمی ءِ۔ اسہ وخت ئس کنتو پارے کہ: ای مدام ہمو ساعت آ نالت کیوہ ہراتم او شبیر ئے کنا مون آن دریر۔ ہوکِہ او کنے ہم دیسُر تو کنے دا مُرغنا ودار ئے سگوئی تمتوکہ۔ دا ڈکھ ئنا حالت ہزار آ بلوچ خاہوت آتا چُپ انگا سزا ءِ۔
نمے سما ءِ کہ بی ایس او نا راہشون شبیر بلوچ نا زوراکی نا بیگواہی ئے ہشت سال پورو مننگ آ درو سوشل میڈیا ایکس (ٹویٹر) آ مہم ئس چلّفنگا ہراڑے سیاسی، چاگڑدی بندغی حق آتا ادارہ آک، وکیل، صحافی و ایلو مخلوق نا کُنڈ آن اونا یلہ کننگ نا خواست کننگا۔
