زوراکی ئٹ بیگواہ کننگوک ذاکر مجید بلوچ نا لمّہ پارینے کہ کنا مار ذاکر مجید بلوچ ئے 15 سال مُست 8 جون 2009 آ زوراکی ئٹ بیگواہ کننگاسس۔ او دائسکان بیگواہ ءِ و ای اودے ہمو دے آن پد اینو اسکان ہچ خنتنُٹ۔ اسہ لمّہ ئسے نا است خواہک کہ او تینا مار ئے جنِہ و اودے خمب کے، ولے ہر گدرینگوکا دے کنا است پین پنسہ کیک۔
او پارے کہ ذاکر مجید خوانندہ لیڈر ئس اسک، اودے دا وڑ بیگواہ کرسا بے ڈس و نشان کننگ و ٹارچر سیل تیٹ بند کننگ بندغی حق آتا لتاڑ ءِ۔ کنا است ہورک ءِ اندن کہ زند ئنا اسہ بشخ ئس کنے آن پھلنگ مسنے۔
ذاکر مجید نا لمّہ ودیک پارے کہ کنا مار ئنا زوراکی نا بیگواہی نا دڑد کنے جتا ناجوڑی تا گواچی کرینے۔ ای است ئنا ناجوڑ ئسے اٹ ولے پدا ہم انصاف کن ہر دروازہ ئے ٹھکیفِوہ۔ کنا بدن نا کمزوری، کنا است ئنا دڑد ئنا مونا ہچ اف، ای بیرہ تینا زاکر نا واپسی نا دعا کیوہ۔
او پارے کہ ای عدالت، کمیشن آتیان بیدس اسلام آباد، کراچی و کوئٹہ ٹی برانز و ریلی تیٹ اوار مسونٹ۔ ناجوڑی و پیری آن بیدس ہم ریلی و برانز ئٹ اومیت ئٹ اوار مریوہ کہ نوا ظالم تا است ئٹ رحم برے و او کنا ذاکر ئے کنے ایتر۔ ولے دا امیت ہم کنا است ئٹی لگوکو پِت ئس جوڑ مسنے ہرا ہر پاس کنا دڑد ئے زیات کیک۔
او ودیک پارے کہ ذاکر نا آجوئی کن اونا ایڑ فرزانہ مجید ہم ریلی و برانز تیٹ اوار مس و کوئٹہ آن کراچی و کراچی آن اسلام آباد آ پندھ مارچ کرے، ولے داکان بیدس ہم کنے و فرزانہ ئے دائسکان انصاف رسینگتنے۔ نن تینا جہد ئے گڈیکو ساہ اسکان برجاء تخون، ولے کنا خن تا مونا کنا مار ئنا خالی کرسی ہڑدے کنے یات ترفک کہ نن اخس بے وس اُن۔
او پارے کہ خضدار ئٹی کنا اُرا غا جلہو کننگا، اُرا تِہ لٹ پُل کرسا گڑا تِہ پرغنگا و بچوکا مڈی تِہ لُٹِسہ دریر۔ دا وڑ ئنا زوراکی کرسا ننے فریشان کننگک کہ نن ذاکر نا آجوئی کن توار ہرفپن ولے نن چُپ مروفن۔ کنا است ئٹ اسہ لمّہ ئسے نا است خواہی ءِ کہ او تینا مار ئنا کُٹ ئٹ کاٹم ئے تخِہ، ولے کنا خنک بیرہ خڑینک آتیان پُھر ءُ۔
او بلوچ راج ئنا کل فکری تپہ و کل بیوس آ راج آتیان خواست کرے کہ کہ 13 اکتوبر آ زوراکی نا بیگواہی تا برخلاف سوشل غا مہم ئس مرو ننتو اوار مبو و کنا مار ذاکر جان تون اوار ٹارچر سیل تیٹ بند کل زوراکی ئٹ بیگواہ کننگوک بندغ آتا آجوئی کن توار ہرفبو۔ دا اسہ لمّہ ئسے نا دڑد ءِ ہرا تدوکا 15 سال آن تینا مار ئنا کسر ہروک ءِ، امیت تون اوار کہ اسہ دے اونا مار واپس برو و اوڑتون بھاکر کرو، ولے ہر ہنوکا دے تون او امیت ہم اونا است آن پیشتمنگ ءِ۔
