بی ایس او نا مسکوہی چئیرمین و بی این ایم نا مسکوہی سیکریٹری جنرل ایڈووکیٹ رحیم بلوچ چاگڑدی حوالکاری میڈیا ایکس آ پوسٹ ئس کرسا پارے کہ کوزہ گیر پاکستانی فوج ئنا دُو آن شبیر بلوچ نا زورانسری بیگواہی ئے ہشت سال مسک ولے انگہ سما اف کہ پاکستان نا فوج اودے اراڑے، انت حال ئٹی و انت ڈوہ ئٹی قید کرینے تورینے۔
او پارے کہ 04 اکتوبر 2016 نا دے پاکستانی فوج گوْرکوپ ئٹی شبیر بلوچ ئے اونا زائیفہ گودی زرینہ بلوچ و خلک ئنا ایلو بندغ آتا مونا دزگیر کرے درے، دے اینو اِسکان او بیگواہ کرے۔
او ودیک پارے کہ شبیر جان نا پین ہچ ڈوہ افک، اونا ڈوہ بیرہ ہندادے کہ اود اسہ سرپند و سمائیو ( conscious )بلوچ ورنا سے۔ شبیر جان اَرا وخت کہ دزگیر مسک او وختا بی ایس او آزاد نا بنجائی انفارمیشن سیکریٹری اسک۔
اونا پاننگ اس کہ بلوچ قوم ئنا زیردستی، تینا وطن ئٹی اونا بے وسی و بے اختیاری نا دڑد شبیر جان تون سہنگ متوکہ ہندائیان اود بلوچ راج ئنا زیہا پاکستانی فوج ئنا ہڑدے نا اُرش و لشکر کشی، پُھل و غارتگری نا توننگ کن کرودھ و کوکار کریکہ۔
رحیم بلوچ پارے کہ شبیر بلوچ چیئرمین زاہد کرد، شہید رضاء جہانگیر و شہید لمہ کریمہ بلوچ نا کاروان ئٹی اسہ روشنو اِستار ئسے ہرانا روشنائی مدام دشمن نا خن تیٹی لگاکہ۔ کوزہ گیر پاکستان نا ظالم و زوراک آ لشکر بلوچ قوم ئنا او روشنا غا استار ئے دزگیر کرے ولے شبیر جان نا زائیفہ گودی زرینہ بلوچ، اونا دڑد خواھا ایڑ گودی سیما بلوچ ،اونا گل و سنگت آتا، بلوچ راج و دوسخاہ تہِ سما اف کہ دشمن شبیر بلوچ ئے تینا ازیت گاہ تا تہارمہ ٹی بندی کرینے داسکان تورینے یا اودے شہید کرینے؟
او پارے کہ ہندائیان شبیر جان نا زائیفہ گودی زرینہ کوزہ گیر آ پاکستان نا فوج و ایلو واکدار تیان مدام سوج کیک کہ اود تینے سروزان سرپد مرے یا جنوزان؟ بلہ بے مَہذب، کم شرف و خن شیف آ دشمن تینا ڈوہ ئے ڈھکنگ کن خُلیس آن گودی زرینہ نا سوج آتا ورندی تِفک۔ او لغور ئٹی ورندی تِننگ نا جاغون افک۔ گودی سیما، گودی زرینہ اینو تنیا افس اوفتتون مُچ بلوچ قوم سلوک ءِ۔ اینو ہزار آ بلوچاک پاکستان نا فوج و ایلو اختیاردار تیان ہندا سوج کننگُر۔
اوایسر ئٹ پارے کہ پاکستانی فوج و اونا تھاس چٹ تا بگیری ٹی بلوچ قوم ئنا شیر زال آ چنا نیاڑی تا، پیر و ورنا تا تمردی، جاغون و جغر، جوزہ و ہمت ئے خنوہ تو کنا یخین پین پکّو مریک کہ بے شک جہان ئٹی پین کسس پاکستان ئے اونا ظلم و زوراکی تا حساب ہلے یا ہلپ ولے بلوچ قوم ریاست پاکستان ئے، اونا کل اختیاردارا تِہ دے نہ دے ئس الّم انصاف کن پابجولان عدالت ئٹی ھتو سلیفو، اوفتیان اسہ اسہ ظلم و جور ئنا باست خواست کرو۔
