بلوچستان نا ضلع کیچ ئنا ہند تجابان ئٹی ایف سی نا پاسو آن تجابان ئٹی لس آبادی تیا تینا مون گولہ باری کننگا و سُمکاری آن چار شمبے پنیئو ہندی بندغ ئسینا مسڑ سُم لگنگ آن سخت ٹپی مسنے۔
ٹپی مروک مسڑ ئے تربت آن پد کراچی اسپتال آ دننگانے۔
تدینی آن پد تجابان کرکی، سنگا آباد تون اوار ہیب کھیب ئنا ہندی بندغ آک سی پیک کسرئے بند کرسا برانز بناء کریر۔
برانزی تا پاننگ ءِ کہ ایف سی نا کیمپ ئنا آبادی آن پیشتمنگ اسکان برانز برجاء مرو۔ انتئے کہ اوفک الس ئے بیزار کرینو، ساندہ تیبہ نن گولہ خسِرہ و سُمکاری کیرہ۔
ایلو کنڈ آن کولواہ ٹی پاکستانی لشکر نا لشکر کشی برجاء ءِ۔
حوال تا رد ئٹ بلوچستان نا ضلع کیچ ئنا ہند کولواہ ٹی پاکستانی لشکر نا زمینی و بالی لشکر کشی برجاء ءِ۔
ہندی حوال تا رد ئٹ درو پاکستانی لشکر نا کاروان کولواہ و ہیب کھیب ئنا ہند آتیٹی سر مسنے و لشکر کشی ٹی مُسہ جنگی ہیلیک بشخ ہلنگ ءُ۔
