بلوچ یکجتہی کمیٹی تینا اسہ شنگ کروکو درشان ئسیٹی پارے کہ بلوچستان چیریٹیز رجسٹریشن اینڈ ریگولیشن اتھارٹی نا ڈائریکٹر جنرل تنظیم اسہ نوٹس ئس شنگ کرسا دعویٰ کرینے کہ بی وائی سی اسہ بے قانودی تنظیم اسے ہرافک اُلس آن بے قانودی فنڈ مُچ کرینو۔
او پارے کہ بلوچستان ئٹی بندغی بحران و مروکا زنک کشی آن ویتہ، اتھارٹی اسہ راجی مسخت، بلوچ راجی مُچی کن تنظیم نا فنڈ مُچ کننگ ئے اسہ میار ئس پاننگ ءُ۔
ترجمان پارے کہ ریاست و اونا ادارہ آک مایوسی نا حالیت ئٹی بلوچ زنک کشی نا برخلاف تنظیم نا پُر ایمن مزاحمتی تحریک تون مون تننگ کن ہر منکن جواز پٹنگ ءُ۔ اسہ کنڈ آن ریاستی لشکر بلوچ آتا قانود، بندغی حق آتِہ لتاڑنگ ءُ و اوفتِہ زند ئنا حق تننگ افس و ایلو پاسو آن ریاست تینا قانود و ادارہ تِہ بلوچ نا راستی نا توارئے توننگ کن کارمرز کننگءِ و بلوچستان ئٹی سیاسی باسک و پُرایمن کاریم تا ہچو جاگہ ئس النگ افس۔
او پارے کہ ہنوکاتم ئٹی ڈی جی آئی ایس پئ آر دعویٰ کرے کہ بی وائی سی اسہ مافیا اسے۔ حکومت تنظیم ئے پریشر گروپ و دہشت گرد آتا سہولت کار پائک۔ ڈی جی چیریٹیز اتھارٹی تنظیم ئے بےقانودی فنڈ مُچ کروکا بےقانودی این جی او پائک۔ وزارت داخلہ تنظیم نا باسک آتِہ انسداد دہشت گردی ایکٹ نا فورتھ شیڈول ئٹی شاغانے۔ دا کُل بلوچستان ئٹی پُر ایمن شاری تِہ، سیاسی و بندغی حق آتیکن کاریم تیان توننگ کن اسہ منظم ءُ پالیسی اسے۔
او پارے کہ بلوچ راج بی وائی سی تون اوار ریاست و اونا ادارہ تا راستی آن واخب ءِ۔ بلوچ یکجہتی کمیٹی اسہ شاری و بندغی حق آتا تنظیم اسے ہرا بلوچ راج ئنا گواچن آ غاو آتا نمائندگی کیک و بلوچ الس ئنا پاسو آن بااختیار ءِ۔ تنظیم نا کاریم ویتہ بیدادی، جہانی جمہوری اصول و جہانی بندغی حق آتا قانود نا رد ئٹ ءِ۔ بلوچ راج، ایلو مظلوم آ راج آک، جہانی کہول و جہان ئٹ بندغی حق آتا تنظیم آک بی وائی سی ئے اسہ جائز پلیٹ فارم ئس منیرہ۔
او پارے کہ ایلو دروشم ئٹ تنظیم ئے پرتشدد ظاہر کننگ اسہ ریاستی پروپیگنڈہ اسے۔ ریاست السی مخ تفی نا سوب آن سوگو ءِ و پُر ایمن سیاسی باسک آک و تنظیم نا برخلاف زننگا زوراکی نا چم بازی تیان مُر مفک۔
او پارے کہ تنظیم بلوچ راج ئنا خدمت ئے برجاء تخک و بلوچ زنک کشی نا برخلاف ہر نہاد آ مزاحمت کیک۔
