زوراکی نا بیگواہی تا گواچی مروک دلجان بلوچ نا خاہوت اسہ بیان ئس شنگ کرسا پگہ آواران ئٹ یو بی ایل بینک آواران نا مونا دہ بجہ غا برانز ئس اڈ تننگ نا پڑو کرینے۔
او تینا بیان ئٹ پاریر کہ بلوچستان ئٹی زوراکی نا بیگواہی تا چرجوئی برجاء ءِ۔ اینو بلوچستان ئٹی دہنو اُرا ئس اف ہرا دا زوراکی نا گْواچی اف۔ نن دا ریاست نا آئین نا رد ئٹ ایمنی ئٹ برانز کننگ ئٹی اُن ہرا ننا آئینی حق ءِ۔ نن دا ریاست آن وار وار آ خواست کرینُن کہ ننا بندغ آتہ تینا قانود و آئین نا ور ئٹ عدالت آتا ہتہ، ولے پدا ہم ننا دڑد ئے ماریتَو کہ ننا خاہوت اَرا ڈکھ ئٹی ءِ۔ نن تون دہن انتئے منّنگ ئٹی ءِ نن ہِچ پُہہ مننگ افّن۔
او پاریر کہ اینو نن خننگ ئٹی اُن کہ مچّا بلوچستان نا ہر علاقہ ٹی بیگواہ غا بندغ آتا خاہوت آک کسر تہ تفسہ برانز کیرہ، خواست کیرہ دا ریاست آن دا نا پارلیمنٹ ئٹی تولوکا بندغ آتان کہ ننا بندغ آتا ہنت ڈوہ ئس ارے اوفتہ تینا عدالت آ ہتبو، قانودی وڑئٹ اوفتا ڈوہ ئے پھاش کبو پدا اوفتہ سزا ایتبو۔ ولے کیہی سال آن مخلوق تینا بندغ آتا یلہ مننگ کن کسر تیا خوار ءِ، اوفتا عکس آتہ ہفّسہ فریات کننگ ئٹی ءُ ولے اوفتہ بنوکو کس اف۔
او پاریر کہ دلجان بلوچ ئے دوانزدہ جون 2024 آ نن ئنا تہامئی ٹی اونا اُرا ٹی پیہسہ لمّہ باوہ و چُنا تا مونا گھرّیسہ دریر ہرا اسہ بندغ دشمنو عمل اسے۔ دلجان نا خاہوت خواست کننگ کن دا ریاست نا ہر در آ ہنا۔ ہر ہمو در ئے ٹھکیفے ہراڑے آئین نوشتہ کننگک ہراڑے آئین نا حساب آ اسہ ڈوہدار ئسے سزا تننگک۔ ولے بےبختی ءِ کہ دلجان نا خاہوت ئے اینو اسکان دا ریاست نا نیمہ آن انصاف رسینگتنے۔
او آواران نا الس آن خواست کرسا پاریر کہ دلجان نا سرسلامت آجوئی کن چھار اکتوبر آ جمعہ نا دے ایمنی ئٹ اسہ ریلی ئس کشّنگو۔ نن آواران نا مخلوق آن خواست کینہ کہ دا ریلی ٹی بشخ ہلسہ دلجان نا خاہوت نا توار مبو۔
دلجان نا خاہوت نا پاننگ اس کہ اینو دلجان نما توار کن ہُننگ ئٹی ءِ، اینو دلجان نا خاہوت نما توار نا ودار ءِ۔ چھار اکتوبر نا ریلی ٹی بشخ ہلسہ اسہ راج، اسہ بلوچ و اسٹی نا درشانی ئے کبو۔ چھار اکتوبر جمعہ آ دلجان نا خاہوت نم کن ودار ئٹی ءِ۔
