بلوچستان نا ضلع پنجگور نا علاقہ چتکان آن بیگواہ کننگوک اِرا ایلم عابد نور و صابر نور ئنا خاہوت نا کنڈ آن اینو پنجگور ئٹ برانز کرسا ریلی ئس کشنگ مس۔
برانزی ریلی جاوید چوک آن پیشتمِسہ اللہ اکبر چوک آن مرسا ڈپٹی کمشنر نا دفتر نا مونا سر مس ہراڑے برانزیک تولوک برانز کریر۔
ڈپٹی کمشنر نا دفتر نا مونا برانز ئٹ سول سوسائٹی نا حاجی افتخار بلوچ، بی این پی عوامی نا رحمدل بلوچ، حق دو تحریک نا چئیرمین ملا فرھاد بلوچ، بارڈر رکھ ئنا سعود احمد، چاگڑدی شخصیت ادریس بلوچ و پنی آ سیاسی سروک ملک میران بلوچ تون اوار ایلو بندغ آک تران کرسا پاریر کہ بےڈوہ آ بندغ آتا و خوانندہ غا تا زوراکی نا بیگواہیک بیم تروک دروشم ئس ہلکنو۔
او پاریر کہ ہڑدے بے ڈوہ آ بندغ آتِہ بیدس سوب آن بیگواہ کرسا خاہوت آتِہ فریشان کننگک۔
او پاریر کہ نن اسہ سلامی جمہوری ڈیہہ ئسیٹی رہینگنہ دا ڈیہہ ئنا قانود و راہبند ارے ولے بد بختی ئٹ قانود و ریاستی راہبند ئے لتاڑِسہ ریاست تینا الس ئے فریشانی تا گواچی کننگ ءِ۔
اوفتا پاننگ اس کہ بیگواہ صابر نور و عابد نور بھاز شریف و بےڈوہو بندغ ءُ اوفتا ہچو بےقانودی کاریم ئسے تون تعلقداری اف ولدا ہم او تدوکا اسہ ہفتہ ئسے آن بیگواہ ءُ اوفتا ہچ ڈس اف۔
او پنجگور نا انتظامیہ و ایلو ادارہ تیان خواست کریر کہ صابر نور و عابد نور تون اوار ایلو کُل بیگواہ کننگوک بندغ آتِہ یلہ کرسا اوفتا خاہوت آتِہ انصاف تننگِہ۔
یات مرے تدوکا چھار دے آن عابد نور و صابر نور ئنا بیگوائی نا برخلاف اوفتا خاہوت بھلو کچ ئسیٹی چُنا نیاڑی تتون اوار سی پیک کسر ئے بند کرسا برانز کننگ ءُ۔ و اینو اوفتا سرسلامت آجوئی کن برانزی ریلی ئس کشار۔
