ٹائم میگزین نا 100 زہم تخوک شخصیت آتا 2024 نا لڑ ئٹ بلوچ یکجہتی کمیٹی نا بنجائی آرگنائزر و راہشون ڈاکٹر ماہ رنگ بلوچ نا پن ئے ہم اوار کرے۔
میگزین نا رد ئٹ ماہ رنگ بلوچ نا پاننگ ءِ کہ اودے باور بفک کہ او دنو دے ئس خننگ کن زندہ مرو کہ اونا راج ودیک زوراکی تا گواچی مروف۔
31 سالی ڈاکٹر ماہرنگ بلوچ نا پاننگ ءِ کہ او بیم تننگ، دزگیری و کھسفنگ تا کوشست نا گواچی مسنے۔ پاکستان ئٹی ننا زند آتا باور اف۔
تدوکا اِرا دہک ئٹ، ڈیہہ ئنا بلوچ اقلیت ئٹی جنگ ئنا برخلاف ریاستی کریک ڈاون نا سوب آن بھلو کچ ئسیٹی زوراکی نا بیگواہی و بیدس عدالت بندغ آتِہ کھسنف نا لڑ بناء مسنے، ہراٹی ماہ رنگ بلوچ نا باوہ ہم اوار ءِ، ہرا اسہ سیاسی کاریم کروک ئس اسک و بیگواہی آن پد اونا جون خننگا۔
اونا جون 2011 ٹی خننگاسس۔ بلوچ راج ئنا بھاز آ نرینہ غاک بیگواہ مننگ آن پد، ماہ رنگ کون آ زالبولک داسا ایمنی ئٹ بلوچ آتا حق کن جہد کننگ ءُ۔
تدوکا دسمبر ئٹی او کیہی زالبول تا موہکشی ئے کرسا پاکستان نا بنجائی شار اسلام آباد اسکان پندھ مارچ کرے، ہرا تینا مار، ایلم و ارغ تیکن انصاف نا خواست کننگ اسر۔
دا مارچ بلوچ جہد آ بھاز پام ترفے ہرا گوادر بلوچ راجی مچی ئے اڈ ترسا ہر شار آن ہزار آ بندغ آتِہ اُرا تیان پیشتمنگ آ بیوس کرے۔ او ریاست نا ہر ظلم ئنا برخلاف ایمنی ئٹ جہد کرسا اوفتے گوڈ آتیا ہلیس۔
ڈاکٹر ماہ رنگ ئے باور ءِ کہ او ہرا ترندی ئے ودی کرینے او برجاء مرو۔ "بھاز خطرہ ارے، بھاز ظلم ارے۔ واہم نن بندغی کن جہد کننگ ئے ہرحال ئٹ برجاء تخون” او پارے۔
