بیگواہ شبیر بلوچ نا ایڑ سیما بلوچ چاگڑدی حوالکاری میڈیا ایکس آ اسہ وڈیو کلہو ئس شنگ کرسا پارینے کہ اکتوبر 4، 2024 آ کنا ایلم شبیر بلوچ ئے پاکستانی عقوبت خانہ غا تیٹ 8 سال پورو مرو۔ ہشت سال پاننگ بھاز اڑزان ءِ ولے دافتے تیر کننگ بھاز سخت ءِ۔
او پارے کہ بلوچ قوم ئٹی بیرہ شبیر اف ہرا بیگواہی نا گواچی مسنے، بلکہ ہزار آ شبیر آک اریر ہرافتے ہڑدیئی بنداو آ بیگواہ کننگک۔ پاکستانی لشکر نا ادارہ غاک او بندغ آتِہ ہرفِسہ بیگواہ کیرہ، خدا چائک اوفتِہ ارانگ دیرہ، ولے بھاز وخت یا تو اوفتا جشوک جونک خننگرہ ئا اوفتِہ نیم مڑدہ حالیت ئٹ یلہ کیرہ۔
او ودیک پارے کہ کنا پیر انگا لمّہ، شبیر نا نیمہ جنوزان زائیفہ و نن کُل شبیر نا سر سلامت آجوئی کن اخس منکن مننگ کیک کوشست کننگ اُن۔ پاکستانی ادارہ آتیان ننا خواست ءِ کہ اگہ شبیر تون اوار ایلو بندغ آک ڈوہ ئس کرینو تو اوفتِہ عدالت آتیٹ ہتنگ مرے، ولے دن اوفتا خاہوت آتِہ سزا تننگ مف۔
سیما بلوچ پارے کہ شبیر نا سرسلامت آجوئی کن 4 اکتوبر آ اسہ ایکس کیمپین ئس اڈ تننگو۔ نن کُل بندغ آتیان خواست کینہ کہ دا کیمپین ئس بشخ ہلِسہ شبیر تون اوار ہرا بندغ آک ہم پاکستانی ادارہ غا تا دو آن بیگواہ کننگانو اوفتا آجوئی کن توار بڑز کننگِہ۔ دا کیمپئین دے ئنا 2 بجہ آن نن ئنا 10 بجہ اسکان برجاء مرو۔
