بلوچ وائس فار جسٹس نا ترجمان اسہ بیان ئس شنگ کرسا پارینے کہ زوراکی نا بیگواہی تا برخلاف چاگڑدی حوالکاری میڈیا غا اسہ آن لائن برانز ئس کننگو، ہرا 13 اکتوبر آ نن ئنا 8 بجہ آن 12 بجہ اسکان اڈ تننگو۔ دا برانز بلوچستان، سندھ، خیبرپختونخوا، کشمیر و ایلو علاقہ آتیٹ ریاستی لشکر نا کنڈ آن بندغی حق آتا لتاڑ نا برخلاف توار بڑز کننگ نا مسخت ئٹ اڈ تننگو۔
ترجمان پارے کہ نن دا برانز نا زریعت ئٹ جہان ئے سرپند کننگ خواہنہ کہ زوراکی نا بیگواہی اسہ بھلو ویل ئس ءِ ہرا نا کنڈ آ دمدستی پام تننگ بکار ءِ۔ نن دا بندغ آتا خاہوت آتتون سلوک اُن ہرا تینا بندغ آتا زوراکی نا بیگواہی نا دڑد ئے سگنگ ءُ۔
او پارے کہ دا برانز نا مسخت نہ بیرہ سرپندی تننگ ءِ بلکہ زیمی مروکا تا حق ئٹ توار بڑز کننگ ہم ارے۔ نن خواہنہ کہ زوراکی نا بیگواہی تا گواچی بندغ آتا خاہوت آتا کسہ آک بِننگ مریر و دا ویل ئے سوبری ئٹ پُہہ مننگ مرے۔
ترجمان پارے کہ بلوچ قوم تون اوار ایلو مظلوم آ قوم و بندغ دوست آتیان خواست کینہ کہ او دا برانز ئٹ تینا وس ئنا کچ اوار مریر۔
او پارے کہ بیگواہ غا بندغ آتا خاہوت، صحافی، بندغی حق آتا کارکن، و ایلو ایکٹوسٹ آک تینا اِرا منٹ ئنا ویڈیو جوڑ کیر، ہرا دا زوراکی نا بیگواہی تا کسہ آتا بارث ئٹ مرے، و چاگڑدی حوالکاری میڈیا غا شنگ کیر۔ داکان بیدس گرافک ڈیزائنر آک زوراکی ئٹ بیگواہ کننگوک بندغ آتا پوسٹر و ویڈیو ڈاکومنٹری جوڑ کیر، صحافیک رپورٹ و آرٹیکل لکھیر و بندغی حق آتیکن کاریم کروکا ہم دا مہم ئٹ اوار مریر و تینا مخ تفی نا درشانی کیر۔
ترجمان پارے کہ دا برانز دا ہیت ئنا پیدواری ءِ کہ نن کُل دا ویل ئنا برخلاف اسہ توار ئسے اُن۔ ننے دا ویل ئنا توننگ کن اوار کاریم کننگ بکار ءِ تاکہ بندغی حق آتے رکھینگ مرے۔
ترجمان پارے کہ دا برانز بندغی حق آتا حالیت آ پام ترفنگ نا اسہ وارخواہی ئس ءِ و نن کُل بندغ دوست آتیان خواست کینہ کہ او دا مہم ئٹ اوار مریر۔
