بلوچستان پاکستان نا جائز بشخ ئس اف، بلکہ دادے غداری و ریفنگ ئٹ پاکستان ئٹ اوار کننگانے۔ صحافی فرانسسکا مارینو
تدوکا دے تیٹ بلوچ نیشنل موومنٹ (بی این ایم) نا کنڈ آن اڈ ہلوک پنچمیکو جہانی بلوچستان کانفرنس ئٹ پنی آ اطالوی صحافی ہرا بلوچستان نا بارث ئٹ اسہ کتاب ئس ہم لکھانے، تران کرے و بلوچستان نا دیہاڑی و ساڑی آ حالیت آتیا ہیت کرے۔
او پارے کہ بلوچستان پاکستان نا جائز بشخ اف بلکہ دادے غداری و ریفنگ ئٹ پاکستان تون اوار کننگا، گواچن ئٹ بلوچستان اسہ کوزہ مروکو ڈیہہ اسے ہرادے بے قانودی تاغت ئٹ پھُلنگ مسنے۔
مارینو شابیتی ئٹ پارے کہ بلوچستان نا پاکستان تون اوڑدئی ٹی زور و رویفنگ اوار ءِ، اوڑدئی نا دستاویز آتیا زور ئٹ دستخط کرفنگاسس ہرا نا ہچو قانودی حیثیت ئس اف۔ دا وختا بلوچستان ئٹی اسہ راہبندی بادشاہت، کلات نا اسمبلی اوڑدئی آن مُست اِرا وار دا اوڑدئی آن نمن کرے۔
او پارے کہ دا دیہاڑی گواچنک پاکستان نا کنڈ آن بلوچستان تون اسہ کالونی ئسے نا وڑ روشت نا بنداو ئے پھاش کیرہ۔ بلوچ الس ئے اسکول و سرکاری ادارہ آتیٹ اوفتا زبان ئے کاریم ئٹ ہتنگ نا حق تون اوار بنداوی حق آن پد بٹِنگانے۔
او محمد علی جناح نا کڑد ئنا پیدواری کرے، ہرا بلوچستان نا آجوئی کن انگریز آتتون مذاکرات نا وختا خان آف کلات نا قانودی مشیر اس۔ او پارے کہ ’’جناح خان آف قلات نا باور ئے پرغا و بلوچستان ئے زوراکی ئٹ پاکستان ئٹ اوار کننگ ئٹ آسراتی تس۔‘‘
اندن او پارے کہ امر پاکستانی لشکر پدان کلات ئٹ پیہا و خان ئے اوڑدئی نا دستاویز آتیا دستخط کننگ آ بیوس کرے۔
مارینو دا ہیت آ ہم روشنائی شاغا کہ امر دا خطہ ئے ایٹمی تجربہ و سلاہ مُچ کننگ کن کاریم ئٹ ہتنگ مسنے و بلوچ الس ئے پد بٹِنگ مسنے۔
"او المی خذمت آتا کاختی و فوج ئنا بھلو کچ ئسیٹی ساڑی گری آ اشارہ کرسا پارے کہ ’’ بلوچستان ئٹی، اسپتال آتیان گیشتر فوجی چھاؤنی ارے۔ حیرانی نا ہیت ئس اف کہ انتئے اوڑے بھاز کم اسپتال ءُ۔‘‘
او ودیک پارے کہ بلوچستان ئٹی برجاء جنگ او علاقہ نا پنچمیکو بغاوت ءِ، ہرا 2007 ئٹی نواب اکبر بگٹی نا خون آن پد بناء مس، ہراکان گڈ دا جنگ سلتنے۔‘‘
او پاکستان نا حکمت عملی نا درشانی کرسا پارے کہ بیدس عدالت مخلوق ئے کھسفنگ، اشتماعی قبر و بلوچ الس ئنا بھلو کچ ئسیٹی بیگواہ مننگ، خوالخواک دا بیگواہی تیکن اندنو وضاحت ایترہ ہرافتے بندغ پُہہ مننگ کپک، منَہ کوالخواہ تا دعویٰ ءِ کہ بندغ آک شاپنگ ٹرپ آ دبئی آ ہنانو یا مش تیا ہنانو۔
مارینو پاکستان چین اقتصادی راہداری ( سی پیک) آ نغد کاری کرسا پارے کہ سی پیک نا ذریعہ ئٹ بلوچستان ئٹی چین ئنا دو شاغنگ بلوچ آتِہ گیشتر پد بٹینے۔گوادر اشرافیہ تا گوازی نا جاگہ ئس جوڑ مسنے و بلوچ آتِہ شونداری آن مُر کننگانے، صاف انگا دیر، مچھی ہلنگ و بنداوی آجوئی آن ہم مُر کننگانو۔
او پارے کہ چینی و فوجی فائدہ آک ہند ئنا بروکاتم زور ءُ۔
او شابیت آتِہ نشان تس کہ امر بلوچستان نا سیندک و ریکوڈک کانڑ تیٹی چینی سرمایہ کاری نا مڈی تِہ لٹنگانے و کسر، انفراسٹرکچر چینی فائدہ تیکن اڈ تننگانے، ہرانا بنداوی سواد آن ہندی بندغ آک مُر کننگانو۔
مارینو نشان ترسا بندغی حق آتا دستاویزی لتاڑ تیان پد ہم پاکستان نا جغرافیائی سیاسی رکھ آتا سوب آن بھاز کم جہانی زور ارے۔ زیات فریشانی نا ہیت دادے کہ دا بلوچستانی نسخہ ئے داسا ” پاکستان نا ایلو ہند آتیا ہم چکاسنگ ءُ۔ پشتون، سندھی و کشمیری علاقہ آتیٹی ہم ہندُن زوراکی مننگ ءِ۔
او مُستی جہانی برادری آ زور شاغسہ پارے کہ پاکستان آن حساب ہلنگ مرے، دانا اسٹ انگا کسر دادے کہ پاکستان آن جہانی قانود آتا رد ئٹ ورندی ہلنگ مرے، ہرا نا پابندی کُل ریاست آتا برابری ئٹ مرے۔
فرانسسکا مارینو اسہ اطالوی صحافی اسے ہرادے جاندمی ایشیا نا بارث ئٹ شابیت آزموندہ ارے و وغداری ئٹ لائمز – اٹالین ری ویو آف جیو پالیٹکس و ایلو اطالوی و سوئس میڈیا آؤٹ لیٹس تیکن لکھیک۔ اندا زوت ئٹ او ’ لتاڑنگوک و دتر چُر بلوچستان ‘ نا پن ئٹ اسہ کتاب ئس شنگ کرفینے۔ 2010 ئٹی، اودے اطالوی جرنلزم تمغہ، Il Luigiano d’oro ہم تننگاسس۔
