بلوچستان نا ضلع پنجگور آن درو زوراکی ئٹ بیگواہ کننگوک ایلم تا آجوئی کن اینو ارٹمیکو دے برانز برجاء ءِ۔ اندن خاران آن بیگواہ کننگوک چھار بندغ نا بیگواہی تا برخلاف خاہوت آتا برانز پنچمیکو دے برجاء ءِ۔
پنجگور ئٹ دا وختا برانز جاہ آ چُنا نیاڑی تا بھلو کچ ئس روڈ ئے بند کرسا برانز کننگ ءِ ہرا نا سوب آن ہنوک بروک اُلاخ آتا قطار لگوک ءِ۔
خاہوت آتا پاننگ ءِ کہ ہراتم اسکان اوفتا بندغ آک آجو متنو او تینا برانز ئے برجاء تخور۔
ایلو کنڈ آن خاران ئٹ بیگواہ غا بندغ آتا برانز اینو پنچمیکو دے ہم برجاء ءِ۔ اندن برانزیک اینو خاران ریڈ زون آن برانزی ریلی ئس ہم کشار۔
برانز ئٹ چُنا نیاڑی تا بھلو کچ ئس اوار ءِ، و بیگواہ غا بندغ آتا خاہوت آک تینا بندغ آتا آجوئی نا خواست کرسا نعرہ ہم خلکر۔
خیال ئٹ مرے خاران بازار آن پاکستانی لشکر نا دو آن زوراکی ئٹ بیگواہ کننگوک خاران نا ہندی تاجر امان اللہ محمد حسنی و کلی جنگل رحمت اللہ آن امین اللہ، ارشاد احمد و داؤد نا زوراکی نا بیگواہی نا برخلاف خاہوت آک خاران ریڈ زون مسنگ پرسن چوک آ برانز بناء کریسر ہرا دائسکان برجاء ءِ۔
اندن درو سہب ئنا شش بجہ غا پاکستانی لشکر پنجگور نا علاقہ تار آفس ئٹی چھاپہ خلِسہ اِرا ایلم صابر نور و عابد نور ئے زوراکی ئٹ بیگواہ کریسس ہرا نا برخلاف اوفتا خاہوت برانز بناء کرے ہرا اینو ہم برجاء ءِ۔ اوفتا خاہوت نا کنڈ آن پریس کانفرنس کرسا انتظامیہ ئے دو بجہ اسکان نا وخت تننگاسس و اوفتا آجو مفننگ آن گڈ خاہوت برانز کرسا سی پیک روڈ ئے ہر وڑ ئنا ہن ءَ بر کن بند کرے۔
