بلوچ یکجہتی کمیٹی نا بنجاہی جارکش تینا درشان ئٹی پارینے کہ ریاست نا کُنڈ آن امن ئٹ جہد کروکا سیاسی جہدکار آتِہ دہشت گردی نا پِنا توننگ ئے منّوفن۔
او پارینے کہ بی وائی سی نا بنجاہی راہشون صبغت اللہ ئے ‘انسداد دہشت گردی ایکٹ 1997ء’ نا فورتھ شیڈول ئٹ شاغنگ بلوچ و بلوچستان نا بارت ئٹ ریاست نا زوراکی و کوزہ گیری فکر ئے پھاش کیک۔ بی وائی سی آن شاہ جی نا جہد بنیاتی وڑ ئٹ ریاست نا ہمو زوراکی تا برخلاف ءِ ہرافتان بلوچ زنک ایسری منّنگ ئٹی ءِ۔
بی وائی سی نا پاننگ ءِ کہ ملک ئنا آئین بندغی حق آتا جہانی قانود آتا رِدئٹ ہر بندغ ئے خیال ئنا درشانی، ہِننگ بنّنگ و امن ئٹ مُچ منّنگ نا حق ارے۔ امن ئٹ جہد کروکا تہ دہشت گردی تون گھنڈنگ جہانی جمہوری قانود آتان برخلاف ءِ و دا بندغی جان تہ خطرہ ٹی شاغک۔ بلوچستان ئٹی سیاسی جہدکار تا بنیاتی حق آتہ خلّنگ، بلوچ اُلس ئنا توار ئے شیف کنّنگ و اوفتا راستنگا خواست آتہ توننگ کن دہن کنّنگک۔
جارکش مُستی پارے کہ ویتہ سوگوؤ ثبوت آن سیاسی جہدکار آتا برخلاف ریاست نا قانودی رُو رزائی نہ بیرہ جہانی کنونشن نا شاری و سیاسی حق آتا برخلاف ءِ بلکہ دا نسل پرستی نا ایلو پِن ءِ۔
او گُڈی ٹی پارے کہ نن جہانی مخلوق و بندغی حق آتا تنظیم آتا زور شاغنہ کہ او دا وڑ نا زوراکی تا برخلاف توار ہفّر۔ بلوچ چاگڑد نا ہر طبقہ ئے دہنا نوآبادیاتی قانود آتا برخلاف جہد کروئی ءِ۔
