بلوچ آجوئی لشکر (بی ایل اے) نا ترجمان آزاد بلوچ تینا شنگ کروکا درشان ئٹی پارینے کہ دوانزدہ ستمبر 2024 آ نن ئنا چھار بجہ غا علی خان تل ہرنائی ٹی پاکستانی جیٹ آک سرمچار آتیا بھلو و زوراکو بمب بٹیر، ہراڑے شش سرمچار سنگت شہید مسر۔
او پارے کہ جلہو آن پد کم ظرف آ دشمن شہید سرمچار آتا جون تِہ بےشرفی کرے و ہیلی تا کمک ئٹ جون آتا اُزبہ آتِہ تینتو درے۔
اونا پاننگ اس کہ جیٹ ئنا بمباری ٹی شہید مروکا سرمچار شہید شفو سمالانی عرف تادین، شہید صمد خان چھلگری مری عرف دوستین، شہید محمد گل مری عرف وحید بلوچ، شہید غلام قادر مری عرف انجیر بلوچ، شہید عبید بلوچ عرف فدا و شہید تاج محمد چھلگری مری عرف بابل نا جہد و قربانی آ اوفتہ سلام کینہ۔
جارکش پارے کہ شہید غلام قادر مری عرف انجیر بلوچ نا تعلقداری نساؤ جبھر آن اس۔ او 2014 ٹی تنظیم ئٹی بس۔ کاہان، بمبور و ایب ءَ کھیب ئنا علاقہ آتیٹ ہفت سال اسکان زمہ واری پورو کننگ آن پد ہنوکا مُسہ سال آن او بولان نا سنگر آ جہد کریکہ۔ ہرنائی ٹی شہید مروکا سرمچارک علاقہ ٹی گشت آ اسّہ و شہید غلام قادر مری اوفتا کماندار اس۔ او اسہ ہندنو خاہوت ئسے آن ءِ ہرا بلوچ جہد ئٹی پیڑی تیان قربانی تسّنے۔ اوڑان مُست اونا مُسہ ایلم شہید ناڈی جمیل مری، شہید کووڈا شادی خان مری و صعبت خان مری بی ایل اے نا کاروان آن آجوئی نا جہد ئٹی شہید مسّنو۔ تنظیم اونا گشاد، خواری و دہ سال نا جہد ئے شرف تیک۔
او پارے کہ شہید شفو سمالانی عرف تادین نا تعلقداری غربو بولان آن ءِ، او تینا جہد ئنا بِنا ئے 2016 ٹی بی ایل اے آن کرے۔ دا ہشت سال ئٹی او بھازا سنگر آتا سوگوی ئٹ راجی خزمت آتہ پورو کرسہ کرے۔ او اسہ مخلص، خواری کروک و محنتی ءُ سرمچار ئسے نا وڑئٹ مدام یات کنّنگو۔
او ودیک پارے کہ شہید گل محمد مری عرف وحید بلوچ نا تعلقداری چمالنگ برگ آن ءِ۔ او بی ایل اے نا شہید فدائی درویش مری، شہید چاکر بولانی و شہید گل محمد نا الّہ نا مار اس۔ اونا خاہوت دشمن ریاست نا زوراکی تا سوَب آن ہنوکا بیست سال آن وطن آن پیشن ءِ۔ او ہنوکا مُسہ سال آن سنگر آ جہد کریکہ، راجی جوزہ تخوکو، دلیر و بھادرو سرمچار ئس اس۔
ترجمان پارے کہ شہید عبید بلوچ (فدا) باوہ نا پِن محمد امین نا تعلقداری پانوان گوادر آن ءِ۔ او ہندا سال مارچ ئٹی بولان نا سنگر نا بشخ مس۔ چھنکو وخت ئسیٹ او تینا گشاد، جِہد و خواری ئٹ جوانو سرمچار ئسے نا تیبر آ بس۔
اونا پاننگ اس کہ شہید تاج محمد چھلگری مری عرف بابل نا تعلقداری بولان پل کوڈی آن ءِ۔ او ہنوکا مُسہ سال آن بولان نا سنگر آ جہد ئٹی اس۔ اونا خاہوت کوزہ گیر ریاست نا ظلم ئنا سوَب ہمپینے۔ اونا ایلم شہید کمانڈر نادر مری (گْونڈو) شہید لال محمد چھلگری تون اوار اونا تعلقداری ہمو شرفدارا اُرا آن ءِ ہراڑان نُہہ شہید نا تعلقداری ءِ۔ تنظیم اونا و اونا خاہوت نا قربانی ئے شرف ایتک۔
آزاد بلوچ پارے کہ شہید صمد خان چھلگری مری عرف دوستین نا تعلقداری غربو بولان آن ءِ۔ او ہنوکا یک و نیم سال آن بی ایل اے ٹی جہد کننگ ئٹی اس۔ او مخلصو، خواری کشوکو و دلیرو سرمچار ئسے نا پن ئٹ یات کنّنگو۔
او ایسر ئٹ پارے کہ دا جنگ ئے بلوچستان نا تیبہ آجوئی اسکان برجاء تخنگ کن بی ایل اے شہیدا سنگت آتا دتر آ سوغند کیک۔
