بلوچستان آن زوراکی نا بیگواہی تا برخلاف ‘وائس فار بلوچ مسنگ پرسنز’ نا کیمپ ئے اینو 5588 دے مس۔
گریشہ نال آن بروکا محمد خان بلوچ، ضامن چنگیزی و ایلوفک بیگواہ غا بندغ آتا خاہوت آتون اواری نا درشانی کریر۔
‘وائس فار بلوچ مسنگ پرسنز’ نا وائس چیئرمین ماما قدیر بلوچ تران کرسہ پارے کہ بلوچستان ئٹی ریاستی فوج ئنا زوراکی ہرا وڑئٹ زیات مننگ ئٹی ءِ او بلوچ وطن آ اسہ بھلو بندغی نسخان ئسے نا بِناء مننگ کیک۔ ریاستی فوج ئنا زوراکیک ہنوکا مُسہ تُو ئٹی پین گیشتر مسّنو۔ ریاست بلوچستان ئٹی ہچّو جہانی قانود ئسے نا پابند خننگپک، داسا ہم مُست آن بار خلّنگ بٹنگ آن پد سلپک۔
ماما قدیر بلوچ پارے کہ بیرہ ہنوکا اسہ تُو ئنا تہہ ٹی ریاستی فوج بالی و ڈغار نا لشکرکشی تیٹ پنجا آن گیشتر بلوچ ورنا زوراکی ئٹ بیگواہ کرینے و بھاز آتِہ شہید کرینے۔ خوانوکا ورنا تہ تینا سزا جاہ تیٹ بند کرینے۔
ماما قدیر بلوچ پارے کہ بلوچستان ئٹی ریاستی فوج ئنا دا وڑ ئنا زوراکی تیان گمان ہندادے کہ بلوچ آتا زند ئکن بھلو سختی ودی منّنگ ئٹی ءِ۔ ریاستی ایجنسی تا کارندہ آک بلوچ آتہ بیگواہ کیرہ و بھلو سزا آن پد شہید کرسہ اوفتا جون تہ بلوچستان نا کیہی جہہ تیا خسّرہ۔
او مُستی پارے کہ بلوچ آتہ بھلو وخت ئسے آن پاکستان و اونا ادارہ آتیان انصاف نا ہچّو اومیت ئس اف، ولے او جہانی ادارہ ‘اقوام متحدہ’ و ایمنسٹی انٹرنیشنل تون اوار بندغی حق آتا توار ئے ہفّوکا تیان دا اومیت کیرہ کہ او بلوچستان ئٹی برجاء بلوچ زنک ایسری و بندغی حق آتا لتاڑ نا زیہا گام ہفّور و جہانی بندغی حق آتا شرف ئنا درشانی کرور۔
