حوال تا رد ئٹ زوراکی ئٹ بیگواہ کننگوک بندغ آتا خاہوت آک خاران ئٹ برانز کرسا ریڈ زون ئے بند کرینو۔ اندن اسہ بندغ ئس شال آن بیگواہ کننگانے ہرا نا برخلاف بندغ آک برانز کرسا کسر ئے بند کرینو۔
خاران برانزی تیٹ عبدالقادر نا مار امان اللہ، محمد انور نا مار محمد داود، امین اللہ نا مار ارشاد احمد و عبدالقادر نا مار امین اللہ نا خاہوت آک اوار ءُ۔
برانزی تیٹ چُنا نیاڑی تا بھلو کچ ئس اوار ءِ، ہرافتا دو تیٹ تینا بندغ آتا پوسٹر آک ءُ۔
خاہوت آتا پاننگ ءِ کہ دا وڑ شرفدار آ شاری تِہ بیگواہ کرسا اوفتا خاہوت آتِہ فریشان کننگ بے انصافی اسے۔
خاہوت آتا پاننگ ءِ کہ امان اللہ محمد حسنی اسہ شرفدارو شاری اسے اِرا وخت ئنا روزی نا کھٹیائی ٹی اختہ اس و محمد داود، امین اللہ،ارشاد احمد نا خاہوت آک پاریر کہ اوفتا بندغ آتِہ کلی جنگل رحمت اللہ آن بیدس سوب آن بیگواہ کننگانے۔
ہر چھار انگا بیگواہ کننگوک بندغ آتا خاہوت آک پاریر کہ اگہ اوفتیا دوبہ ارے و کس ڈوہ ئس کرینے تو اوفتے ڈیہہ ئنا عدالت آتیٹ پھاش کننگِہ و سزا تننگِہ۔
ایلو کنڈ آن شال ئٹ سہیل احمد بازئی پنیئو بندغ ئس زوراکی ئٹ بیگواہ کننگانے ہرا نا برخلاف جہی آ بندغ آک کسر ئے بند کرینو۔
حوال تا رد ئٹ شال ئنا علاقہ چشمہ اچوزئی نا جہی سہیل احمد بازئی ئے سلاہ بند بندغ آک بیگواہ کرسا درینو ہرا نا برخلاف خاہوت تون اوار جہی آ بندغ آک شال چمن و ژوب ئنا کسر بلیلی نا ہند آ کسر ئے بند کرینو۔
او خواست کرینو کہ سہیل احمد ئے زوت یلہ کننگِہ۔
