حوال تا رد ئٹ بلوچستان نا ضلع کیچ ئنا تحصیل دشت آن زوراکی ئٹ بیگواہ کننگوک ولید اینو آجو مرسا تینا اُراغا سر مسنے، اندن لاہور آن زوراکی ئٹ بیگواہ کننگوک بلوچ خوانندہ حامد ہم آجو کننگانے۔
ولید نا آجوئی نا حوال ئے ہندی حوالکار ئس پک کرینے۔
حمزہ نا مار ولید سال ئسے آن بیگواہ اس ہرادے دشت زریں بگ کراس آن ہموتم پاکستانی لشکر دزگیر کریسس ہراتم او تینا سنگت آتون سفر کننگ اسک تدینی ٹی اونا ایلو مُسہ سنگت آتے ہم بیگواہ کننگاسس۔
ولید تون بیگواہ مروکا اونا سنگت آک پدا آجو مسُر و ولید سال ئسے آن پد آجو مرسا اراغا سر مس۔
اندن لاہور نا پنجاب یونیورسٹی آن بیگواہ کننگوک حامد بلوچ ہم آجو مسنے ہرادے پاکستانی لشکر نا ڈکھکوک ادارہ آک دے ئس مُست دزگیر کننگ آن پد بیگواہ کریسُر۔
اونا یلہ مننگ ئے بلوچ اسٹوڈنٹس کونسل پک کرینے۔
بلوچ بندغی و خوانندہ تنظیم آتا کنڈ آن ہندا سوج کننگانے کہ اخس وخت اسکان بلوچ ورنا و پیر انگاتے بیگواہ کننگو و بندغی حق آتِہ لتاڑنگ مرو۔
