‘وائس فار بلوچ مسنگ پرسنز’ نا زوراکی نا بیگواہی تا برخلاف شال پریس کلب نا مونا برانزی کیمپ ئے اینو 5587 دے مس۔
خان گڑھ (جیکب آباد) آن بروکا جسقم نا جہدکار وسیاء اللہ ڈنہ، اللہ رکھا و ایلوفک اواری نا درشانی کریر۔
تنظیم نا وائس چیئرمین ماما قدیر بلوچ ہیت کرسہ پارے کہ ہڑدے بلوچ ورنا تا دتر وہینگ ئٹی ءِ، او بیگواہ منّنگ ئٹی ءُ و لمّہ غاک پِٹّنگ ئٹی ءُ۔ چُناک چھوری و نیاڑیک جنوزان مننگ ئٹی ءُ۔ پیرنگ آتیان اوفتا سیبو اوفتا ورنا آ مارتہ پُھلنگک۔ بلوچ راج ئنا اسہ بیوسو کاروان اسے۔ دشمن ظاہری وڑئٹ ایٹمی تاغت اسے نن داخہ نزور اُن کہ تینا رکھ ئے کننگ کپّنہ یا بلوچ راج ئے تینا رکھ ئنا موکل اف گُڑا انت بلوچ راج غلام ءِ و غلام رہینگو نہ؟ ولے گِڑاس ہندنو بندغ ہم مریرہ ہرافتا مرگ آ ہر اسٹ ڈکھ ئنا گْواچی مریک و افسوس کیک۔ ہمو بندغ آک تینا جند ئنا خْواہنگ و خْوشّی تہ اسہ کُنڈ آ کرسہ راجی بقا کن گُڈیکو دم اسکان جہد کریر۔ انت دہنا راجی دلیر آتہ عیش ئنا زند گدریفنگ گچین لگّتوکہ، انت اوفتے لمہ باوہ، ایڑ ایلم الّتو؟
او پارے کہ کوزہ گیر پاکستانی حاکم آک، فوج و اونا جہی آ لشکر (ڈیتھ سکواڈ) نا دُو آن شہید و بیگواہ مروکا بلوچ ورنا تا، سیاسی جماعت، بندغی حق آتیکن کاریم کروک ایلو تنظیم و جہانی فکر ئے بلوچ راجی جہد ئنا کنڈ آ ہتنگ کن پیشن مُلک ئٹی راہشون آتون اوار مچّا بلوچ راج ئنا بھلا قربانی و سوبر آ جہد ئنا سوَب آن اینو بلوچ راجی جہد تینا تاریخ نا سوگو آ تیبر آ بسّنے۔
