جنیوا ٹی بلوچ نیشنل موومنٹ نا دیوان پنچمیکو جہانی دیوان ئٹ تران کرسابندغی حق آتا پنی آ وکیل پیٹر ٹیچل پارے کہ اگہ سرجمی و سوبر منصوبہ ئٹ مُستی ہتنگہ تو جہانی مخلوق نا کُنڈ آن بلوچ جہد ئے زیات کمک ملّنگ نا گمان ارے۔
او پارے کہ باکستان بلوچستان نا آجوئی ئے چھنکو وخت ئسیک توننگ کیک ولے بھلو مالی، اخلاقی، سیاسی و پِن ئسے نا ایوِز ئٹی۔ اسہ ہیت ئس تو پک اے کہ بلوچستان نا آجوئی رد مننگ کپک و نئے مروئی و نئے بروکا وخت ئٹ دادے رد کننگ مرو۔
بندغی حق آتا پِنی آ وکیل ٹیچل بلوچستان نا امن و آجوئی کن سرجمو منصوبہ ئس مونا ہیس۔ او بلوچ راہشون، جہدکار و جہانی تبصرہ کروکاتہ تون تران کرسہ پاکستان تون سال آتان چلّوکا چھیڑہ و کوزہ نا ایسری کن اسہ پھاشو و عمل ئٹ بروکو منصوبہ سے نا بکار آ زور شاغا۔
ٹیچل بلوچ راج ئنا ویل آتا ہیت کرسہ بیرہ ویل آتا ہیت ئنا جہہ آ اوفتا حل ئنا کُنڈ آ تَک ئس شاغا۔ او پارے کہ نن غُٹ مسئلہ آن سرپند اُن ننے ہرا گِڑا آ غور کروئی ءِ ایسر کروئی ءِ۔۔
جہانی آجوئی نا جہد ئتو سلِنگ نا تینا بھلا تجربہ آن او پارے کہ بلوچستان نا بروکا وخت اونا مخلوق نا دُو ٹی ءِ۔ دا کنے آ یا پین ڈن ئنا بندغ ئسے آ اف کہ او حل کشّے۔”
تینا تران ئٹی "بلوچستان فریڈم چارٹر” نا بابت ئٹ او پارے کہ داد اولیکو وار جنیوا ٹی بلوچ جہدکار آتا نیمہ آن مونا ہتنگا۔ دا چارٹر جھیڑہ آتہ کم کننگ و بلوچستان نا راجی آجوئی نا رکھ ئکن اسہ کسر ئس نشان تیک۔
او پارے کہ اگہ سرجم و سوبرو منصوبہ ئس ہتنگہ تو جہانی مخلوق نا نیمہ آن بلوچ جہد ئے کمک نا گیشتر گمان ارے۔
او بلوچستان ٹی امن و آجوئی نا حق ئنا دوئی کننگ کن تینا صلہ تہ تِس، اوفتیٹ ‘اقوام متحدہ’ نا کماشی ٹی زو ئس جنگ بندی، سیاسی بندی تا آجوئی و ہڑتُما کُنڈ آن سِلاہ بند جلہو تا ایسری اوار ءُ۔
او بلوچستان ئے صحافی، کمکی تنظیم و بندغی حق آتیکن کاریم کروکاتیکن ملِنگ نا پارے ہرافتا دا وخت آ خطہ ٹی رکھ ءِ۔
او آجوئی نا جنگ ئنا سوَب آن بےاُرا مروکا بندغاتا ولدا اُرا تیا بنّنگ، اوفتا میراث آتہ ولدا تنّنگ و نسخان آتا ایوِز ئے ہم خواست آتیٹ اوار کننگ نا سَلاہ تِس۔
او ڈنّی بندغ آتا آبات کاری ئٹ بلوچستان نا آباتی ئے بدل کننگ نا پاکستانی طریقہ آ افسوس کرسہ دادے نوآبادیاتی چم بازی نا وڑ ئس پارے۔
امن نا اولیکو خواست ‘اقوام متحدہ’ نا بھلُنی ٹی مخلوق نا رضا ئے ہرّفنگ (ریفرنڈم) ءِ۔ بلوچستان نا مخلوق ئے آجوئی تون اوار تینا بروکا وخت ئے گچین کننگ نا وارخواہی ئس ملّو۔ ٹیچل پارے کہ دا حق ‘اقوام متحدہ’ نا چارٹر ئٹی ارے و بلوچ قیادت ئے داڑا ہیت کروئی ءِ۔
تینا تران ئٹی، ٹیچل اسہ آجو و تینا واک تخوکو بلوچستان ئسیکن تینا خیال ئے مونا ہیس، ہرا نا روتہ آک چاگڑدی انصاف، بریبری و جمہوریت تون تفنگر۔ او بروکا بلوچستان نا زیہہ آ گپ کرسہ پارے کہ اونا غُٹ بھاتی تیکن بندغی حق آتہ منّنگہ، نیاڑی تا بریبر حق آتون اوار۔ روایتی وڑئٹ قبائلی و پدری نظام ئٹ خطہ ٹی بریبری نا بےمنّنگ بھلو ویل اسے۔
او ملکیت نا حق ئکن صلہ ترسہ پارے کہ غُٹ خت ءَ بروت آ بلوچ آتیکن ڈغار ئٹی ونڈ مروئی ءِ۔ دا وڑئٹ دولت و ڈغار نا بشخنگ ئٹ بھلو کچ ئس فرخ ئے چھٹفنگ مریک۔
دولت و طاقت ئے ولدا انصاف ئٹ بشخنگ نا صلہ ترسہ او پارے کہ بلوچستان نا مال ءُ مڈی تیان اسہ چھنکو بشخ ئسے نہ بلکہ لس مخلوق ئے آسراتی رسینگوئی ءِ۔
او اسہ سیکولر ریاست ئسے نا جوڑنگ نا مخ تفی ئے کرے، ہراڑے قانودی وڑئٹ غُٹ مذہب آتہ بریبری مرے و ہچّو عقیدہ سے ایلوڑان بُڑز ہلّنگپ۔
او پارے کہ اسہ جمہوری ءُ بلوچستان ئس بندغی حق آتا جہانی کچ ئنا حساب آ خیال آتا درشانی نا آجوئی، برانز و صحافت ئے شرف ایتہ۔
گُڈی ٹی او بےقانودی ئٹ ہلّنگ و بیگواہ کننگ نا زیہہ آ انکوائری کمیشن ئسے نا خواست کرے۔” دا وڑ ئنا پٹ ءَ پول آن بیگواہ مروک و اوفتا خاہوت آتہ انصاف رسینگو۔ او بلوچ قیادت آ زور شاغا کہ او تینا مقدمہ ئے جہانی مخلوق نا مون آ پھاش و عمل ئٹ بنّنگ نا منصوبہ سیٹ تخِہ۔
او بلوچ جہد و ایلو تاریخی جہد آتا اواری ئٹ جاچ ئے ہلسہ پارے کہ ویتنام نا امریکی کوزہ نا برخلاف سرسوب مننگ آن دا پھاش مریک کہ جوزہ تخوکو اسہ چُھنکو مخلوق ئس ہم اسہ زوراکو دشمن ئسے خلّنگ کیک۔ ڈیوڈ، گولیتھ ئے کھٹنگ کین”۔ او پارے کہ غُٹ آن بار بلوچ آتہ ہم تینا اختیار نا حق ارے۔
او جوزہ سیٹ پارے کہ پاکستان بلوچستان نا آجوئی ئے ہُرے شاغنگ کیک ولے اودے دا نا بھلو قیمت ئس پُھر کروئی تمّو۔ دنیا خننگ ئٹی ءِ و بلوچستان نا آجوئی ئے بروکا وخت ئٹ رد کننگ مفک۔
پیٹر ٹیچل 1967ء آن بندغی حق آتا، جمہوریت و جہانی انصاف نا وکیل اسے۔ اودے دہ سال آن گیشتر مریک بلوچ آجوئی نا جہد ئنا حمایت ئے کیک۔ ‘پیٹر ٹیچل فاؤنڈیشن’ نا وسپہ ئٹ او برطانیہ و جہانی تیبر آ بندغی حق آتیکن مہم چلّفنگ ئٹی ءِ۔
