پاکستان ئٹی ادارہ غاک قانود و رہبند آتہ بےشرف کننگ ئٹی ءُ۔ سمی دین بلوچ
بندغی حق آتا جہدکار و زور ئٹ بیگواہ کننگوک ڈاکٹر دین محمد بلوچ نا مسڑ سمی دین بلوچ نا ڈنی ڈیہہ تیا سفر آ رکھ ئنا بارث ئٹ سندھ ہائی کورٹ ئٹی ہفّوکا کیس ئنا ارٹمیکو عدالتی سماعت اینو مس۔
سندھ ہائی کورٹ آن پیشن میڈیا تون تران کرسہ سمی دین بلوچ پارے کہ سماعت نا وختا عدالت وزیر دفاع، ایف آئی اے و ایلو کارندہ آتا کلہو کرسہ عدالت آ بنّنگ و ورندی تنّنگ نا پارے، ولے ارٹمیکو سماعت نا وختا ہچّو کارندہ ئس عدالت آ بتو، عدالت داسا ایلو سماعت ئے بروکا ہفتہ ٹی تخانے۔
سمی دین بلوچ پارے کہ داڑا افسوس ءِ کہ دا ملک ئنا قانودی ادارہ غاک تینے قانود آن جتا کننگ ئٹی ءُ، او نہ بیرہ عدالت بلکہ قانود و آئین ئے ہم لتاڑیرہ۔
صحافی تتتون ہیت کرسہ بلوچ جہدکار پارے کہ ریاست ورندی تنّنگ کننگ کپک کہ او اَرا بنیات آ کنے آ رکھ خلّنگ ئٹی ءُ۔ ای امن ئٹ جہد کروکو اسہ سیاسی جہدکار ئسے اُٹ و تینا جہد ئے برجا تخوٹ۔
یات مرے کہ ہندا تُو ئٹی سمی دین بلوچ ئے ایف آئی اے نا کُنڈ آن کراچی ایئرپورٹ آ ہمو وخت آ توننگاسس ہراتم او عمان آ سفر کنّنگ خواہاکہ۔ سمی دین بلوچ نا پاننگ اس کہ ادارہ آک بے سوَب اودے کیہی ساعت اسکان کراچی ایئرپورٹ آ توریر و پدا اودے پاننگا کہ اوڑا بلوچستان حکومت نا کنڈ آن سفر کننگ آ رکھ خلّنگانے۔
سمی بلوچ نا پِن ئے ‘ایگزٹ کنٹرول لسٹ’ ئٹی شاغنگ و سفر آن رکھ خلنگ نا برخلاف جہانی ادارہ آتون اوار یورپی پارلیمنٹ نا باسک ئس ہم افسوس کرسہ پاکستان آن رکھ آ تہ ہفّنگ و بندغی حق آتا جہدکار تا زوراکی کنّنگ ئے بند کنّنگ نا خواست کرینے۔
