کوسٹ گارڈ ئنا رویہ نا برخلاف برانز اینو چھارمیکو دے برجاء کیہی کسرک بند۔
گوادر ئٹی پاکستانی کوسٹ گارڈ نا رویہ و زوراکی تا برخلاف پیک آپ خواجہ غا تا اتحاد نا کُنڈان تِروکا الٹیمیٹم ایسر مننگ آن گُڈ برانز کروکاتا برانز اینو چھارمیکو دے برجاء ءِ، کیہی کسرک دائسکان بند ءُ۔
تدوکا چھار دے آن برجاء برانز نا سوب آن مکران کوسٹل ہائی وے، سی پیک روٹ آ گاڑی تا بلو کچ ئس قطار ٹی سلوک ءُ، کیہی مسافر بس آک ہم گھٹ مسنو۔
یاتی مرے کہ سیمی و ہندی کاروباری آ پیک آپ خواجہ غاتا اتحاد نا کُنڈان پاکستانی کوسٹ گارڈ نا رویہ نا برخلاف چھار دے مالو برانز بناء کننگا، انتظامیہ تون مذاکرات بےسوب مس، اینو چھار دے مریک کہ برانز برجاء ئے۔
برانز کروک آتا پاننگ ءِ کہ انتظامیہ سوبری ئٹ اوفتا ہیت آتے بِننگ اف، ننے مُسِہ دے مریک کہ برانز کننگ اُن ولے دائسکان ننا ہیت ئے بِننگ کِن تیار افس۔ ہندا سوب آن نن بیوس اُن کہ کل کسرتے بند کین۔
برانز کروک آتا پانِنگ ءِ کہ ایسکان کہ انتظامیہ ایکشن ہلپک ننا برانز برجاء مرو کُل ہڑاند آتا زمہ واری ہندی انتظامیہ غا مرو۔
