بارکھان و ڈیرہ بگٹی نا نیامٹ درو سلاہ بند بندغ و ڈیتھ اسکواڈ نا نیامٹ بھلو جھڑپ ئس بناء مس ہرا اینو سہب ئنا ایسر مس ہراٹی کیہی ڈیتھ اسکواڈ نا کارندہ مرگ ئنا گواچی مننگ نا حوال رسینگانے۔
پاننگک کہ سہب آن جنگی ہیلی کاپٹر آک علاقہ ٹی گشت کننگ ءُ، واہم سلاہ بند بندغ آک رکھول پیشتمنگ ئٹ سرسوب مسنو۔
بارکھان و ڈیرہ بگٹی نا سیمی آ علاقہ ٹی درو سلاہ بند بندغ و ڈیتھ اسکواڈ نا نیامٹ بھلو جھڑپ ئس بناء مسس ہرا اینو ایسر مس۔
حوال ارے کہ دا جھڑپ ئٹ وزیر اعلیٰ بلوچستان سرفراز بگٹی نا ایلم ہم ٹپی مسنے واہم دائسکان دا حوال پک مننگ کتنے۔
حوال تروکا پاریر کہ سلاہ بند بندغ آک جنگ ئنا وختا وار وار آ تینا جاگہ غا تِہ بدل کرسا کریرہ و ڈیتھ اسکواڈ نا کارندہ غاک رکھوک پوزیشن آ مننگ آن ویتہ ہم سلاہ بند بندغ آتا پوزیشن تیا جلہو کننگ کتور۔
ہندی حوال تا رد ئٹ سلاہ بند بندغ و ڈیتھ سکواڈ نا نیامٹ دا جھڑپ بھاز بھلن اس و مُچا نن سم تا توار بِننگ مس، او ودیک پاریر کہ سلاہ بند بندغ آک ڈیتھ اسکواڈ نا کارندہ غا تِہ اوفتا کھئوکا بندغ آتا جون تِہ ہرفنگ نا وار ہم تتور۔
جنگی ہیلی کاپٹر آک اینو سہب ئنا علاقہ ٹی گشت بناء کریر، ولے سلاہ بند بندغ آک ڈیتھ اسکواڈ نا کیہی کارندہ مرگ ئنا گواچی و ٹپی کننگ آن گڈ رکھوک اوکان پیشتمار۔
لیویز دا حوال ئے پک کرینے کہ سلاہ بند بندغ آک بیدس جانی نسخان آن اوکان پیشتمنگ ئٹ سرسوب مسنو۔
سلاہ بند بندغ آک درو پاکستانی لشکر نا چوکی و اسہ موبائل ٹاور ئسے اِرا جتاؤ جلہو تیٹ ٹک کننگ آن گڈ پاکستانی لشکر و سرفراز بگٹی نا ہندی ڈیتھ اسکواڈز نا بندغ آک سلاہ بند بندغ آتا رند ئٹ تمار و مُست آن سنگر ہلوک سلاہ بند بندغ آک ڈیتھ اسکواڈ نا کارندہ غا تیا اسہ بھلو جلہو ئس کریر۔
خیال ئٹ مرے بارکھان ئٹ موبائل ٹاور و پاکستانی لشکر آ ایلو جلہو تا زلہ واری ئے آجوئی خواہوک سلاہ بند تنظیم بی ایل ایف ہرفیسس ولے ڈیتھ سکواڈ نا کارندہ غا تتون دا بھلا جھڑپ نا زمہ واری ئے دائسکان ہچو تنظیم ئس ہرفتنے۔
