ڈاکٹر نسیم پارے کہ پاکستان تون چین ئنا کمک بیرہ تہہ ئنا مسئلہ ئس اف بلکہ دا نا جہانی زہم مرو۔
جنیوا سوئٹزرلینڈ ئٹی بلوچ نیشنل موومنٹ نا چیئرمین ڈاکٹر نسیم بلوچ بی این ایم نا پنچمیکو بلوچستان جہانی دیوان ئٹی تران کرسہ پارے کہ ہراتم نم بلوچستان نا پِن ئے بنرے تو نم نشخہ آ اسہ ڈغار ئس سوچنگ کیرے ولے بلوچستان بیرہ اسہ زمین ئسے آن بھلُن ءِ۔ دا اومیت و زند آتا قبرستان جوڑ مسّنے ہراڑے اسہ رنگ بندغی لتاڑنگ مننگ ئٹی ءِ۔
بی این ایم پنچمیکو بلوچستان جہانی دیوان ئے سرسوبی ئٹ اڈ تِس، دا اسہ اہمو دیوان ئسے ہرانا مسخت بلوچ راج آ مروکا زوراکی تہ جہانی تیبر آ پھاش کننگ اس۔ جنیوا ٹی مروکا دیوان ئٹی جہانی جہدکار، اسکالر و بی این ایم نا باسک آک بشخ ہلکُر، ہراکہ آجوئی و بندغی حق آتیکن بلوچ جہد ئے مونا دنّنگ کن اوار ءُ۔
"وطن آن ڈنّ آ رہینگ، زوراکی نا سوَب آن ءِ، تینٹ گچین کننگ ئس اف۔” او پارے۔
تینا ذاتی تجربہ نا حوالہ ئٹ ڈاکٹر نسیم بلوچ بلوچستان نا خلق ئسے آن ڈاکٹر ئس مرسہ فرانس ئٹی وطن آن مُر زند گدریفنگ اسکان تینا سفر نا حوال ئے تِس۔ او دا ہیت آ زور شاغا کہ اونا ایکان داڑے بنّنگ آسراتو زند ئسے نا پٹّینگ الّو بلکہ پاکستانی ریاست نا ظلم و زوراکی تیان بچّنگ کن لازم اس۔
او پڑو کرے کہ ” ای داڑے اُست خْواہی دُوئی کننگ کن یا تینا ذاتی ڈکھ آتہ بنفنگ کن بتوٹ۔ ای داڑے تینا مخلوق، بلوچ راج ئنا داستان ئے بنفنگ کن سلوک اُٹ، ہرانا توار بلوچستان آن پیشن پشتونستان، سندھ، گلگت بلتستان و کشمیر نا راج آتیان بُڑز مریک۔
تینا تران ئٹی، ڈاکٹر نسیم بلوچ بلوچستان نا نازُرکا حالت آ ہیت کرسہ پارے کہ بلوچستان بیرہ زمین نا کھپ ئس مننگ آن زیات ءِ ہرا اومیت و زند آتا قبرستان جوڑ مسّنے، ہراڑے اسہ رنگ بندغی لتاڑننگ مننگ ءِ۔” او خطہ ٹی پاکستانی فوج ئنا زوراکی تیا ہیت کرے کہ ہراڑے زوراکی نا بیگواہی، بےقانودی ئٹ خلّنگ بِٹنگ و مسخ آ لاش آتا خسّنگ اسہ دڑدیئو راستی ئس مسّنے۔
او مستونگ نا "درست مفروکا جون تا قبرستان” نا بارت ئٹ ہیت کرے، ہراڑے ریاستی زوراکی تا گْواچی مروکا نادرست آ بندغاتہ اوفتا خاہوت آتیکن عزت، انصاف یا توننگ آن ویتہ کھڈ کیرہ۔” انت بندغی حق آتہ منّوکا ریاست ہندن کننگ کیک؟” او پارے کہ پاکستان نا کاریمک دہشت گرد ریاست ئسے نا عکس ئے پھاش کیرہ۔
ڈاکٹر نسیم بلوچ خطہ ٹی چین ئنا مونا بنّنگ آ ہم کھتّی کرے، خاص وڑئٹ اونا تزویراتی منصوبہ آتہ ہرا بلوچ راج ئنا حق آتہ پُھلیرہ۔ او خبردار کرے کہ پاکستان ئے چین ہنا کمک بیرہ تہہ ئنا اسہ مسئلہ ئس اف بلکہ دا نا جہانی زہم ءُ، خاص وڑئٹ ہندی تاغت و ‘آبنائے ہرمز’ نا سمبھال ئے ٹِک کروکا ڈٹ آتا سوَب آن۔
او پارے کہ ای اسٹ ئس چیلنج کیوہ کہ او بلوچستان نا بابت ئٹ پاکستان و چین ئنا نیام ئٹی مروکا معاہدہ آتا سرجم حوال آتہ پھاش کے۔ ” بلوچ راج ئے اونا ڈغار و مال و مڈّی تا بارت ئٹ ہر فیصلہ آن کشّنگانے۔
بلوچ راہشون زور شاغسہ پارے کہ بلوچ جہد بیرہ بندغی حق آتا برخلافی آ مننگ ئٹی اف بلکہ بنیاتی وڑئٹ راجی آجوئی نا جہد ءِ۔ بندغی حق آتا برخلافی ہمو وخت اسکان چھٹّوف کہ ایتم اسکان نن آجو متَنُن۔
او جہانی مخلوق آ زور شاغا کہ او بلوچ راج ئنا آجوئی نا خْواست ئے کمک کے، کہ بلوچستان اسہ وخت ئس آزات و واک تخوکو ریاست ئس اس۔
ڈاکٹر نسیم بلوچ پارے کہ بلوچستان نا آجوئی بیرہ اسہ ہندی ویل ئس اف بلکہ جہانی انصاف نا سوج اسے، ہرا پشتون، سندھی، کشمیری و ایلو محکوم راج آتا جہد ئتون تفوک ءِ۔
تران ئنا ایسری محکوم راج آتا و جہانی اتحاد آتا اواری نا بَٹنگ آ مس۔ ڈاکٹر نسیم بلوچ پارے کہ بلوچ جہد، ہرا کیہی سال آتیان برجاء ءِ، ہمو وخت اسکان برجاء مرو کہ اے وخت اسکان بلوچستان کوزہ ءِ۔ او پڑو کرے کہ نن تینا آجوئی اسکان جارات ئٹ تولوفن۔ ” آزات بلوچستان نا جہد زندہ باد۔”
