حوال تا رد ئٹ دشت ئٹی نا دُرست آ سلاہ بند بندغ آک جلہو کرسہ موبائل ٹاور ئے تباہ کریر، کولواہ ٹی سلاہ بند بندغ آک اُلاخ آتِہ تورِسہ پٹار و پاکستانی لشکر نا راش تِہ دوئی کریر دیر۔
شابیتی حوال تا رِد ئٹ اینو شام ئنا دشت کا آپ ئٹی نا درست آ سلاہ بندبندغ آک زونگ کمپنی نا ٹاور ئے سُم کاری کرسہ تباہ کریر و مشینری تِہ ہُشِسہ بھس کریر۔
پین اسِہ کاروائی ٹی اینو شام ئنا وختا کولواہ نا ہند کنیچی ٹی سلاہ بندبندغ آک پاکستانی لشکر کِن راشن دروکا اُلاخ آتِہ تورِسہ راشن تِہ دوئی کریر۔
دننگا کاروائی تا زمہ واری تِہ ساندہ بلوچ آجوئی خواہوک تنظیم آک ہرفینو ولے دائسکان دا تومکا کاروائی تا زمہ واری ئے ہچکس ہرفتنے۔
ایلو کنڈ آن بارکھان و ڈیرہ بگٹی نا سیم اوچھڑی ٹی سلاہ بند بندغ و امن فورس نا نیام ئٹ جنگ ئٹی اِرا کارندہ خلنگا و پنچ ٹپی مسنے۔
شام اسکان اِرا پاسو آن سُمکاری نا حوال اسک، وزیراعلی بلوچستان سرفراز بگٹی نا الّہ نا مار خان محمد بگٹی نا رد ئٹ ڈیرہ بگٹی و بارکھان نا سیم اوچھڑی ٹی سلاہ بند بندغ آتا پاسو آن موبائل ٹاور و چوکی ئے جلہو ئٹی ٹک کننگ آن پد امن فورس نا کارندہ غال سلاہ بند بندغ آتا پد ئٹ تمار گُڑا سلاہ بند بندغ آک سُمکاری کریر، ہراٹی امن فورس نا اِرا کارندہ مرگ ئنا گواچی و پنچ ٹپی مسُر۔
ڈسٹرکٹ ہیلتھ آفیسر ڈیرہ بگٹی ڈاکٹر اعظم نا رد ئٹ ٹپی مروکا امن فورس نا کارندہ غاتِہ ہیلی کاپٹر آتیٹ اسپتال آ ہیسنو۔
یات مرے کہ امن فورس نا سربراہ سرفراز بگٹی ءِ و داسا دا ڈیتھ اسکواڈ نا بھلنی ئے اونا ایلم کننگ ءِ ہرافک بلوچ الس آ زوراکی و بیدادی کیرہ۔
