مکران کوسٹل ہائی وے ہنوکا مسہ دے آن بند ءِ، اُلاخ آتا مرغن قطار لگانے، مسافرک نیام کسر آ گھٹ مسنو۔
گوادر ئٹی پاکستانی کوسٹ گارڈ ئنا گندہ غا رویہ و زیادتی تا برخلاف پیک آپ گاڑی تا خواجہ غاک الٹی میٹم تسوسر ہرا ایسر مس۔ ہراکان گڈ برانز ئے ودفِسہ کوسٹل ہائی وے نلینٹ زیرو پوائنٹ ئے ہم برانز کرسا بند کننگانے۔
برانز نا سوب آن ہندی مسافر تتون اوار ایران آن پاکستان نا ایلو شار تیا ہنوکا دو سد آن زیات بندغ گھٹ مسنو۔
ضلعی انتظامیہ و کوسٹ گارڈ کالخواہ تا کنڈ آن برانز کروکا و برانز ئٹی گھٹ مروکا مسافر تِہ نظر انداز کننگ نا سوب آن مسافرک پندھ آ ہنِسہ گوادر شار آ سر مسر۔
ہمو وخت مسافر تا پاننگ اسک کہ انتظامیہ نا کنڈ آن اوفتے بے یارو مددگار ایلانو، او پاریر کہ اِرا دے او بارڈر آ گھٹ مسوسر و مسہ دے آن سربندن کراس بند مننگ نا سوب آن او سفر کننگ کپسہ۔
برانزی تا پاننگ ءِ کہ انتظامیہ سوبری ئٹ اوفتا ہیت ئے بنپک مسہ دے آن نن برانز کننگ اُن واہم انتظامیہ ننا ہیت ئے بننگ کن تیار اف اندا سوب آن بیوس مرسہ نن کسر تِہ بند کرینن۔
برانزی تا پاننگ اسک کہ ہراوختسکان انتظامیہ ایکشن ہلپک ننا برانز برجاء مرو و کل ہڑاند آ تا زمہ واری ضلعی انتظامیہ غا مرو۔
