بلوچستان نا ضلع کیچ ئنا علاقہ تمپ ئنا جتا شار تتون اوار آواران ئٹ لشکر کشی برجاء ءِ۔
حوال تا رد ئٹ تمپ ئنا جتا علاقہ آتیٹ لشکر کشی ارٹمیکو دے برجاء ءِ۔ کلبر، ناصر آباد و ہیب کھیب ئنا علاقہ غاک لشکر کشی نا پلویڑ ئٹی ءُ، اندن آواران ئٹ ہم لشکر کشی مننگ ءِ۔
حوال تا رد ئٹ تمپ ئنا علاقہ ناصر آباد آن لشکر کشی نا وختا اسہ کُھریاس پاکستانی لشکر نا دو آن دزگیر کننگانے ہرا نا ہچ ڈس اف۔
ہندی حوال تا رد ئٹ درو تمپ ئنا جتا علاقہ آتیٹ فوجی ہیلی کاپٹر آتیٹ کمانڈو دھڑفنگانے۔
اوفتا پاننگ ءِ کہ ناصر آباد نا علاقہ آتیٹ لشکری کارندہ غاک پندھ آ سُر پُر کننگ ءُ و تمپ ئما جھل و جنگل تیٹ ہم لشکری کارندہ غاک جتا ہند آتیا خننگ مسنو۔
ایلو کنڈ آن آواران نا مش تیٹ ہم لشکر کشی نا حوال رسینگانے۔
حوال تا رد ئٹ پاکستانی لشکر نا کنڈ آن نوندرہ آواران نا نیامیکو مش تا لڑ ئٹ اِرا دے آن لشکر کشی مننگ ءِ۔
ہندی حوال تا رد ئٹ پاکستانی لشکر ئے گاڑی و موٹر سائیکل تیا بھلو کچ ئسیٹی سُر پُر کننگ آ خننگ مسنے و پاکستانی لشکر کپر و پھاؤ ٹی لشکر کشی کننگ ءِ۔
حوال تروکا پارینو کہ پاکستانی لشکر تون ہندی ڈیتھ اسکواڈ نا کارندہ غاک ہم اوار ءُ۔ پاکستانی لشکر نا جاسوس ڈرون ہم مش تیٹ گشت کننگ ءِ۔
پاکستانی لشکر نا پاسو آن دا رد ئٹ ہچ ہیت متنے، نئے کہ شابیتی حوال رسینگانے۔
خیال ئٹ مرے بلوچستان نا جتا علاقہ آتیٹ چرجوئی ئٹ لشکر کشی مننگ ءِ واہم کوالخواک دا بارث ئٹ چُپ ءُ۔ ہنوکاتم ئٹ لشکر کشی تیٹ لس مخلوق ئے ٹک کننگ نا حوالک ہم رپورٹ مسنو۔
