بلوچستان لبریشن فرنٹ نا ترجمان میجر گہرام بلوچ تینا شنگ کروک بیان ئٹی پارے کہ تمپ ئنا جہی حاجی محمد نا مار شہید لفٹیننٹ اختر بلوچ عرف علی بلوچستان لبریشن فرنٹ نا سرمچار ئس اسک ہرادے 28 اگست 2024 آ کوزہ گیر پاکستانی لشکر نا کرایہ نا ایجنٹ آک شہید کریر۔
او پارے کہ بلوچستان لبریشن فرنٹ شہید لیفٹیننٹ اختر عرف علی ئے اونا عظیم انگا قربانی آ دروت ندر کیک۔ شہید نا خونی تا پٹ ءَ پول برجاء ءِ ہرافک سنگت سرمچار اختر بلوچ ئے شہید کرینو اوفک راجی میار ئس کرینو تنظیم اوفتا پیدواری ئے کرسا اوفتے منطقی ایسر اسکان سر کیک۔ دُن انگا بندغاک راج ئسیٹی ناسور ءُ ہرافتا ایسر راجی بقاء، آجوئی و دیمرئی کن المی ءِ۔
او ودیک پارے کہ اختر بلوچ تحریک آجوئی نا مخلصو سنگت ئس اسک۔ او خلیجی ڈیہہ تیٹی روزگار کن ہناسس۔ 2009 آ ڈیہہ آ واپس بننگ آن پد بی ایل ایف ئٹی اوار مس و راجی غلامی نا برخلاف جہد کرے، او مشکے ٹی جنگی تربیت ہیل کرے و جتا محاذ تیٹ دشمن نا برخلاف جنگ آتیٹی بشخ ہلک و دشمن ئے بےسوب کرے۔
ترجمان پارے کہ اونا راہشونی نا لائخی تا سوب آن تنظیم اودے شاری نیٹ ورک نا کمانڈر کرے، وختس او لیفٹننٹ نا حیثیت ئٹ تینا راجی زمہ واری تے پورو کننگ اسک، او گوریلہ حکمت عملی نا رد ئٹ شاری علاقہ غا تیٹی سلاہ بندہ کاریم تِہ کرے۔ 2012 ٹی دشمن نا نظر ئٹ بننگ آن پد مش تیٹی بس او سیاہجی، مزنبند، کلبر، زامران، بلیدہ و بالگتر ئٹی بی ایل ایف نا جنگی کاروائی تیٹی بشخ ہلک۔
اونا پاننگ اس کہ شہید اختر 03 اگست 2016 آ سنگت سرمچار شہید امان عرف کنر تون دشمن نا برخلاف کاروائی ٹی سُم لگنگ آن ٹپی ہم مس ولے ٹپ آتیان پد ہم دشمن تون جنگ کرے و تینا سنگت آتے سلامتی ئٹ اوکان کشہ و ہند آ جنگ ئٹی شہید امان عرف کنر لمہ وطن نا رکھ ئٹی شہید مس، شہید اختر صحت مند مننگ آن پد دوارہ تینا راجی زمہ واری تِہ پورو کننگ کن محاذ آ بس۔
میجر گہرام بلوچ ودیک پارے کہ ہنوکا اِرا سال آن او تنظیمی فیصلہ نا رد ئٹ شاری علاقہ ٹی روپوش اسک ہراڑے اودے پاکستانی ایجنسی تا کارندہ غاک شہید کریر۔
او ایسر ئٹ پارے کہ بلوچستان لبریشن فرنٹ سنگت سرمچار شہید لیفٹننٹ اختر علی ئے اونا عظیم انگا شہادت آ دروت ندر کیک و دا قول ئے کیک کہ شہید نا مشن ئے ہر حال ئٹ سرسوب کرسا اونا آجو بلوچستان نا تُغ ئے پورو کرسا دشمن ئے اونا انجام اسکان سر کننگو۔
