خاران نا تحصیل مسکان قلات ئٹ اِرا بندغ نا جشوک جونک خننگانو، وندر و لورالائی آن بیگواہ کننگوک اِرا بندغ آجو مسنو۔
حوال تا ردئٹ خاران نا تحصیل مسکان قلات آن اِرا جشوک جون خننگانو ہرافتے سم کاری کرسا کھسفنگانے۔
پاننگک کہ ہڑتُما جونک مُتکن مسنو ہرافتے سول اسپتال خاران آ دننگانے۔
خاران انتظامیہ نا رد ئٹ بنداوی وڑ ئٹ ہڑتُماک سندھ ئنا جہی پاننگرہ واہم ودیک پٹ ءَ پول مننگ ءِ۔
ایلو کنڈ آن بلوچستان نا علاقہ وندر و لورالائی آن پاکستانی لشکر نا دو آن زوراکی ئٹ بیگواہ کننگوک اِرا بندغ یلہ مرسا تینا اُرا تِہ سر مسنو۔
شابیتی حوال تا رد ئٹ ضلع خضدار نا علاقہ گریشہ نا جہی زاہد بلوچ آجو مسنے ہرادے لسبیلہ نا شار وندر آن پاکستانی لشکر زوراکی ئٹ بیگواہ کریسس۔
اندن لورالائی آن پانزدہ ستمبر آ پاکستانی لشکر نا دو آن زوراکی ئٹ بیگواہ کننگوک ولی جان رحملانی بزدار ہم یلہ مسنے۔
ولی جان بزدار نا خڑک ئنا بندغ ئس حوال تسنے کہ او لورالائی آن یلہ مسنے۔
خیال ئٹ مرے، لورالائی راڑہ شم آن بزدار قبیلہ نا چھار بندغ جتا دیہاڑ تیا زوراکی ئٹ بیگواہ کننگاسع ہرافتیان ولی جان رحملانی بزدار آجو مسنے۔
