بلوچ نیشنل موومنٹ نا ‘اقوام متحدہ’ نا بندغی حق آتا دیوان ئٹی استاد واحد کمبر بلوچ نا زورئٹ بیگواہی آ گپ و تران
جنیوا ٹی بی این ایم نا پیشن نا کاریم تا شعبہ نا ڈپٹی کوآرڈینیٹر و بنجاہی مجلس نا باسک نیاز بلوچ ‘اقوام متحدہ’ نا پنجاہ و ہفتمیکو بندغی حق آتا دیوان ئٹی بلوچستان ئٹی بندغی حق آتا لتاڑ و خاص وڑئٹ زوراکی ئٹ بیگواہی و بےقانودی خلّنگ بِٹنگ آ ہیت کرے۔
نیاز بلوچ ایران نا شار کرمان آن پاکستانی ڈھکوک ادارہ غا تا دُو آن کماش بلوچ راہشون استاد واحد کمبر بلوچ نا بیگواہی آ تران کرے و دیوان آن خواست کرے کہ او استاد واحد کمبر بلوچ و ایلو زوراکی ئٹ بیگواہ کننگوک بلوچ آتا سلامتی ئٹ یلہ مننگ آ زو ئس گھام ہفّر۔
نیاز بلوچ بندغی حق آتیکن کاریم کروکا تنظیم ‘پانک’ ئنا رپورٹ ئے ہم مونا ہیس، ہراٹی پاننگا کہ بیرہ مئی 2024 ئٹی نوَد بندغ ئے زوراکی ئٹ بیگواہ کننگانے ہراکہ دا سال ئنا اسہ تُو ئٹی زوراکی ئٹ بیگواہی تا غُٹ آن بھلا کچ ءِ۔ او پارے کہ تُو ئنا کم ءَ ود چِھل و چھار بندغ زور ئٹ بیگواہ کننگرہ۔ اگست 2024 ئٹی چھانڑدہ بندغ ئے بےقانودی خلّنگانے۔ حوال نا حساب آ ہر تُو ئٹی اٹکل پنچ دہنو تدینی مریک، دا گیشتر دہشت گردی نا پِن مروکا زوراکی تیٹ مریرہ۔
او پارے کہ دا معاملہ بلوچستان نا سیمسر آتیان ہم پیشن سرمسّنے، بلوچ جہدکارک ہمسایہ ڈیہہ تیان ہم بیگواہ کننگرہ۔ نوزدہ جولائی 2024 آ ہفتاد و چھار سال ئنا کماش بلوچ راہشون واحد بخش پِن ئٹ چائنگوک استاد واحد کمبر بلوچ ئے بیگواہ کننگا۔ دا تدینی جہانی خطرہ ئے ودّفے، خاص وڑئٹ اونا عمر و ناجوڑی نا حوالہ ئٹ۔
نیاز بلوچ بندغی حق آتا دیوان آ زور شاغا کہ او دا زوراکی تیا پاکستان آن حساب ہلے و دا وڑئٹ بیگواہ کننگوکا بندغ آتا آجوئی کن سختی ئٹ سلِہ۔
نیاز بلوچ مُستی پارے کہ ای اینو دا دیوان آ زور شاغوہ کہ او بلوچستان ہٹی بندغی حق آتا برخلافی نا گیشتری نا جاچ ئے ہلے و استاد واحد کمبر تون اوار ایلو بیگواہ کننگوک بندغاتا آجوئی نا خواست کے۔ او تینا تران ئے ایسر کرسہ خطہ ٹی بندغی حق آتا لتاڑ و زوراکی تہِ توننگ کن جہانی توار و جہد ئنا خواست کرے۔
