بلوچ نیشنل موومنٹ نا مسکوہی چئیرمین خلیل بلوچ چاگڑدی حوالکاری تلہ ایکس آ پوسٹ ئس کرسا پارینے کہ استاد واحد کمبر بلوچ، بلوچ راجی تحریک نا کماشو راہشون اسے، ہرانا زوراکی ئٹ بیگواہی آ افسوس ءِ۔ دا اولیکو وار اف کہ استاد واحد کمبر بلوچ ریاستی زوراکی تا گْواچی مسّنے۔ اِرا ہزار ہفت ئٹی ہم پاکستانی فوج اودے بیگواہ کرے، بندی کرے و چھانڑدہ تُو اسکان سخت سزا تِس پدا اوڑا دروغ ئنا مقدمہ کننگا و جیل آ راہی کننگا۔ بھلو وخت ئس توننگ آن پد ہم ریاست اوڑا ہچّو ڈوہ ئس پھاش کننگ کتّو و نیٹ عدالت اودے آجو کرے۔
او پارے کہ ریاست نا بیدادی و سِزا تا سوَب آن استاد واحد کمبر بلوچ بھاز آ ناجوڑی تا گْواچی مس، ناجوڑی تا زور و دشمن نا پد ئٹ تمنگ آن اونا خْواریک پین ودّار۔ او تینا بھلن وہی و ناجوڑی تا سوَب آن دے کیہلوک بلوچستان ئٹی علاج کن ہناسس۔ ولے پاکستان نا کارندہ غاک اودے ہموکان بیگواہ کرسہ پاکستانی حاکم آتا حوالہ کریر، ہراڑے اودے عدالت آ ہتنگ نا جہہ آ اسہ وار ولدا زورئٹ بیگواہ کننگانے۔
خلیل بلوچ پارے کہ پاکستان نا کنڈ آن استاد واحد کمبر بلوچ نا زوراکی نا بیگواہی ریاستی زوراکی تِہ پھاش کیک۔ جہانی قانود آتون اوار ‘اقوام متحدہ’ نا بندغی حق آتا جہانی منشور و زوراکی نا بیگواہی تا برخلاف کنونشن، ہر بندغ نا بنداوی حق آتہ منّیرہ۔ دا قانود آک زورئٹ بیگواہی ئے قانود نا چَپ سرپند مریرہ و دا نا برخلاف کاریم کننگ نا خواست کیرہ۔
اونا پاننگ اس کہ نن بندغی حق آتا تنظیم و ہر چائندار آ بندغ آتیان خواست کینہ کہ او استاد واحد کمبر بلوچ نا زو ئس و ویتہ شڑط آن آجوئی کن توار بڑز کیر۔ دا بندغ دشمن و بے قانودی آ عمل نا برخلاف چُپ کننگ تینٹ ظلم ئنا کمک ئے کننگ نا بریبر ءِ۔ جہانی ادارہ خاص وڑئٹ ہمو ادارہ غال ہرا بندغی شرف ئے رکھیرہ، اوفتا لازم مریک کہ او تینا زمہ واری تہ پورو کیر و دہنا ظلم آتا برخلاف گھام ہفّر۔
او پارے کہ ای مچا دنیا نا راج دوست و بندغ دوست آ مخلوق آن خواست کیوہ کہ استاد واحد کمبر بلوچ نا وڑنگا کماش و ناجوڑو راہشون ئسے نا زو ئس آجوئئ کن توار بڑز کیر۔ چاگڑدی میڈیا مہم ئٹ بشخ ہلبو۔ ننے یقین ءِ کہ ہراتم نن غُٹ اسٹ مرسہ توار ہفّون تو دا توار جہانی تیبر آ بنِنگو و زوراکی تا برخلاف جْوان وڑو جہد ئس مرسہ مون آ برو۔
